Ilustrim
IPKO Ende pa Thirrje nga Kodi +383
Megjithëse sipas Telekomit të Kosovës, Autoriteti Rregullativ i Komunikimeve Elektronike dhe Postare (ARKEP), ka dhënë autorizimin për fillimin e përdorimit të kodit të ri, thirrje të tilla momentalisht nuk mund të realizohen nga numrat e operatorit IPKO.
I pyetur nga KALLXO.com se pse nuk ka filluar funksionalizimi i kodit të ri telefonik nga IPKO, Alban Kastrati nga Zyra për Informim e këtij operatori, nuk ka dhënë arsye të qarta.
“IPKO ka filluar të punojë për kalimin në kodin e ri shtetëror +383, ndërsa aktualisht është në pritje të planit të implementimit nga ana e ARKEP. Ne do të jemi në kohë me zbatimin e këtij plani, sipas afateve që do të përcaktohen nga ana e rregullatorit” , tha Kastrati.
Ai gjithashtu nuk është përgjigjur se kur zyrtarisht do të fillojnë thirrjet me kodin e ri në numrat e këtij operatori telefonik.
Telekomi i Kosovës sot ka bërë demonstrimin e thirrjeve nga kodi +383 në operatorin telefonik “Vala”, duke sinjalizuar fillimin e fazës së tranzicionit që do të zgjasë 18 muaj.
Kjo periudhë është afati për largimin e të gjithë kodeve të tjera që deri më tani janë përdorur në Kosovë.
http://kallxo.com/fillojne-thirrjet-kodin-e-kosoves-383/
Megjithë demonstrimin e sotshëm, KALLXO.com ka gjetur se thirrjet me kodin +383 tani për tani mund të realizohen vetëm brenda Kosovës.
Telekomi i Kosovës deklaron se ende priten të bëhen marrëveshjet me operatorët e jashtëm telefonikë për t’u mundësuar thirrjet ndërkombëtare në kodin e ri.
http://kallxo.com/kodi-383-pa-aplikueshem-ne-thirrjet-nderkombetare/