Libri me esetë e studentëve | Foto: ORCA
‘Anës Universitetit’, Libri me Ese i Studentëve për Problemet në UP
Organizata për Rritjen e Cilësisë së Arsimit ka bërë sot publikimin e librit “Anës Universitetit” me ese të studentëve të Universitetit të Prishtinës.
Përmes këtyre eseve studentët e universitetit kanë treguar përvojat e tyre të ndryshme në varësi prej shtresës ekonomike së cilës i përkasin si dhe fakultetit ku studiojnë.
Rron Gjinovci tha se përshtypje i ka lënë fakti që studentët në ese zgjidhjet për problemet i kërkojnë nga jashtë.
Gjinovci po ashtu ka folur edhe për arsyen e vendosjes së titullit “Anës Universitetit”
“Vendosëm që këtë libër ta titullonim ‘Anës Universitetit’ duke provuar ta tërheqim vëmendjen e lexuesit të cilit mund t’i asocojë me poezinë e Fan Nolit ‘Anës Lumenjve’. Aty ka kritikë, autokritikë dhe shpresë, siç ka edhe në esetë e këtij libri”, tregoi Gjinovci.
“Mos ta Kemi Problem Çështjen e Banimit”, “Nota Dhjetë”, “Unë Student Krenar i UP-së” janë disa nga titujt e eseve të studentëve nga universiteti të cilat janë përzgjedhur nga komisioni për publikim në këtë libër.
Duke pasur parasysh që në një masë të madhe të eseve është trajtuar mungesa e librave në bibliotekat e fakultetit dhe konvikteve, ORCA ka filluar sot kampanjën për dhurimin e librave nga qytetarët për bibliotekat e fakultetit dhe konvikteve.
ORCA fton të gjithë njerëzit e interesuar të ndihmojnë studentët me libra, të sjellin librat e tyre të studimeve, ose libra të tjerë që mund t’u duhen studentëve, në zyrën e ORCA-s, nga 15 shkurt deri më 1 mars.