Me përqafime dhe buzëqeshje, Muriqi pritet ngrohtë nga skuadra pas rikthimit te Mallorca

Vedat Muriqi ka zyrtarizuar kthimin te Mallorca të premten, ndërsa ai është pritur mirë nga skuadra ku kaloi gjashtë muajt e fundit.

Klubi spanjoll nënshkroi kontratë pesë vjeçare me Muriqin, për të cilin pagoi 9.5 milionë euro, ndërsa disa miliona të tjerë do të jenë në formë bonusesh.

Ai sot paradite është takuar me skuadrën që sezonin e kaluar shkëlqeu duke i ndihmuar të mbijetojnë në elitë.

Skuadra është gëzuar shumë që Muriqi është rikthyer, duke e përqafuar të gjithë.

Ndërkohë, Muriqi do të qëndrojë në një hotel në Mallorca, derisa ta gjejë një shtëpi. Hoteli ku do të qëndrojë 28-vjeçari e ka bërë një pritje interesante për të.

“Mirë se u kthyet në ishullin tuaj. Paç qëndrim të mirë. Përshëndetje nga i gjithë ekipi”, ishte shkrimi të cilit iu bashkangjitën edhe logoja e klubit spanjoll, flamuri i piratëve dhe ai i Kosovës.

Muriqi njihet me nofën ‘Pirati’, ndërsa është blerja më e madhe e Mallorcas. /Telegrafi/