Vdes ish-kryetari i Malit të Zi
30.6.2019 - 19:45
Ish-kryetari i Malit të Zi, Momir Bullatoviq, ka vdekur sot në moshën 63-vjeçare.
Bullatoviq ishte zgjedhur kryetar i Malit të Zi në zgjedhjet e para shumëpartiake më 1990.
Këtë pozitë, ai e kishte mbajtur deri më 1998, kur u mposht nga atëherë kryeministri e sot presidenti i Malit të Zi, Milo Gjukanoviq.
Ai ka qenë edhe kryetar i qeverisë federative të Republikës Federative të Jugosllavisë për më shumë se dy vite, nga 18 maji 1998 deri më 9 tetor 2000.
Momir Bullatoviq do të mbahet mend si një politikan që doli në anën e Sllobodan Millosheviqit gjatë kohës së shpërbërjes së ish-Jugosllavisë.
Agjencia malazeze e lajmeve Vijesti e citon atë serbe, Tanjug, të thotë se Bullatoviq me gjasë ka vdekur nga sulmi në zemër.