![](https://kallxo.com/wp-content/uploads/2018/04/Thaci.png)
Thaçi për Dialogun me Serbinë: Të Përmbyllen Punët
Në konferencën në lidhje me fazën finale të bisedimeve me Serbinë Presidenti Hashim Thaçi tha se marrëveshja ligjërisht e obliguar duhet të nënshkruhet sivjet.
“Urgjenca për neve dhe Brukseli është që ky vit të jetë korniza kohore për nënshkrimin e kësaj marrëveshje. Për neve kjo marrëveshje është për njohjen e Kosovës nga Serbia dhe normalizimin e plotë të marrëdhënieve”, tha Thaçi.
Ai tregoi çfarë nënkupton marrëveshja ligjërisht e obligueshme mes dy shteteve.
“Kjo marrëveshje do të mundësonte njohjen e Kosovës nga 5 shtete e BE-së, anëtarësimin në organizatat ndërkombëtare”, tha Thaçi.
Ai parashikoi bisedime të vështira në këtë fazë.
“Pyetja është a do të jetë e gatshme Serbia për këtë dhe çfarë kushte do të kërkojë ajo. Rreziku më i madh i mundshëm është moskryerja e këtij detyrimi”, tha Thaçi.
Presidenti deklaroi se punët e pakryera me Serbinë duhet të përfundojnë.
“Në politikën dhe shoqërinë kosovare ka bindje që duhet të përmbyllen punët e papërfunduara. Përmbyllja e dialogut me Serbinë me marrëveshjen ligjërisht të detyrueshme është interes nacional që nuk njeh vijat ndarëse opozitare apo qeveritare”, tha Thaçi.
Për të nuk duhet të vazhdojë status quo-ja dhe as ngrirja e marrëdhënieve Kosovë- Serbi.
“Kanë kaluar 20 vite nga lufta jonë, 19 vite nga konferenca paqes në Rambuje, 10 vjet nga Pavarësia e Kosovës, 7 vite nga fillimi i bisedimeve në Bruksel dhe ende marrëdhëniet e Kosovës dhe Serbisë ende nuk janë të përmbyllura”, tha Thaçi.
Konferenca në lidhje me fazën finale të dialogut u organizua nga Instituti Kërkimor për Çështje të Europiane dhe të Zhvillimit në bashkëpunim me Grupin për Hulumtim të Politikave në Ballkan.