Sarajeva nderon këngëtarin që mbajti koncert në ditët e luftës

Bruce Dickinson, këngëtari kryesor i heronjve britanikë të muzikës heavy metal, Iron Maiden, do të shpallet qytetar nderi i kryeqytetit të Bosnjës, Sarajevës.

Bruce Dickinson, lideri i grupit legjendar të muzikës heavy metal, Iron Maiden, do të bëhet qytetar nderi i Sarajevës, pasi kështu vendosi të mërkurën Këshilli Bashkiak i kryeqytetit të Bosnjës.

Dickinson-it do t’i dhurohet një pllakë në ceremoninë zyrtare të çmimit të planifikuar për në 25 nëntor, njoftoi këshilli në një njoftim për shtyp.

Në vitin 1994, në mes të luftës në Bosnje dhe Hercegovinë, Dickinson bëri një koncert të albumit të tij Skunkworks në Sarajevën e rrethuar.

Vizita e tij në Sarajevë u dokumentua në një film të titulluar “Scream for Me Sarajevo”, i lëshuar në prill të vitit 2017.

Rreth 10,000 civilë, duke përfshirë 1,500 fëmijë, u vranë në Sarajevë gjatë rrethimit 44 mujor të qytetit, kryesisht me snajperë dhe mortaja të lëshuara nga malet që rrethonin qytetin nga 1992-1996.