Ratko Mlladiq ankohet për shëndetin e tij

Ish-komandanti i ushtrisë serbe të Bosnjës, Ratko Mlladiq, i cili po apelon ndaj vendimit të tij të shkallës që parë që e dënoi atë për gjenocid dhe krime të tjera, është ankuar përsëri në gjykatën e OKB-së në Hagë se shëndeti i tij po përkeqësohet.

“Shëndeti im vazhdon të përkeqësohet. Unë nuk jam mjek, kështu që nuk e di se çfarë po e shkakton këtë,” tha Ratko Mlladiq në një konferencë mbi statusin në Mekanizmin për Gjykatat Penale Ndërkombëtare në Hagë të hënën.

Ish-komandanti 75-vjeçar i Ushtrisë Serbe të Bosnjës tha megjithatë se dokumentet mjekësore të ofruara nga personeli i stafit të Njësisë së Paraburgimit të OKB-së përsërisnin se gjendja e tij ishte e qëndrueshme dhe e pandryshuar.

Mlladiq ka pasur disa probleme serioze shëndetësore gjatë qëndrimit në burg dhe ka pësuar dy sulme dhe një infarkt në zemër.

Ai është ankuar vazhdimisht për trajtimin mjekësor që ai ka marrë në paraburgim.

Në maj të vitit të kaluar, kërkesa e tij për shpërfillje të procedurave gjyqësore kundër punonjësve të kujdesit shëndetësor në Njësinë e Paraburgimit të OKB-së u hodh poshtë. Mbrojtja e Mlladiqit pohoi se ata ishin përgjegjës për përkeqësimin e shëndetit të të pandehurit.

Para kësaj, avokatët e ish-shefit ushtarak serb të Bosnjës kanë kërkuar që dhënia e vendimit të tij të shtyhet, që doktorët të ndëshkohen dhe Mlladiq të lirohet për t’u kuruar, duke këmbëngulur se ai nuk ka marrë kujdes të duhur në Njësinë e Paraburgimit dhe se ai kishte nevojë të shtrohej në spital.

Në nëntor 2017, gjykata e OKB-së e dënoi Mlladiqin me burgim të përjetshëm, duke e gjetur atë fajtor për gjenocid në Srebrenicë, përndjekjen e boshnjakëve dhe kroatëve në të gjithë Bosnjën dhe Hercegovinën, terrorizimin e popullsisë së Sarajevës dhe marrjen peng të paqeruajtësve të OKB-së.

Mlladiq u lirua nga akuzat për gjenocid në gjashtë komuna të tjera boshnjake.

Si mbrojtja dhe prokuroria po e apelojnë vendimin.

Mlladiq është mbajtur në paraburgim që nga maji 2011, kur u arrestua në Serbi dhe u dërgua në Hagë.