Avokati: Cozman Lirohet Nesër

Asdren Hoxha, avokati i reperit Ylber Abdullahu, i njohur si Cozman, tha se klienti i tij nuk ka qenë personi i cili ka shtënë me armë në incidentin e djeshëm në qendër të Prishtinës. Kjo, sipas tij, është sqaruar sot.

“I mbrojturi im Ylber Abdullahu me nofkën Cozman nuk është ai person që ka shtënë me armë, dhe mendoj se sot është sqaruar edhe pas zhvillimit të procedurave të nevojshme policore është sqaruar se ai nuk është që ka shtënë me armë”, tha Hoxha.

Avokati theksoi se sot ka kuptuar që klienti i tij më nuk do të dyshohet për veprën penale të vrasjes në tentativë por vetëm për pjesëmarrje në rrahje.

Por, edhe kjo sipas tij është e padrejtë pasi që Cozman në këtë rast është i dëmtuar.

“Kam kuptuar se i mbrojturi im nuk do të dyshohet për veprën penale të vrasjes në tentativë ashtu siç është paraburgos fillimisht por do të dyshohet për veprën penale të pjesëmarrjes në rrahje, çka është e padrejtë pasi që i mbrojturi im është ai që ka pësuar goditje e jo që ka dhënë goditje”, tha Hoxha.

Avokati tregoi se Cozman do të lirohet dhe se ndaj tij nuk do të ushtrohet kërkesë për paraburgim nga prokuroria. “Me rëndësi është se ndaj tij nuk do të ushtrohet kërkesë për caktimin e paraburgimit dhe i njëjti do të lirohet në procedurë të rregullt. E kam fjalën për çështjen në fjalë për të cilën është ndaluar”, tha Hoxha.

Sipas avokatit, Cozman do të lirohet nesër pasi që të skadojë ndalimi prej 48 orësh. “Unë sipas informacioneve që kam nga prokuroria e shtetit i njëjti do të lirohet kur të skadon kjo masë e ndalimit. Ndaj tij është caktuar masa e ndalimit prej 48 orëve dhe ajo skadon tek nesër”, tha Hoxha.

Avokati tregoi se ndaj Cozmanit është paraqitur një urdhëresë për sjellje në një nga institucionet e drejtësisë për një rast tjetër edhe se kjo është arsyeja që ai nuk do të lirohet sot.

http://kallxo.com/flet-avokati-cozman-per-sherrin-e-armatosur-ne-prishtine/

Reperi Cozman është arrestuar dje në lidhje me incidentin e armatosur që ka ndodhur në qendër të Prishtinës, ku janë plagosur reperët e njohur me nofkat Noizy dhe Varrosi.

http://kallxo.com/operohet-noizy-hiqet-nje-plumb/