Zjarri në Fushë Kosovë, 4 persona marrin trajtim mjekësor për shkak të tymit

Katër persona kanë marrë trajtim mjekësor, dy prej tyre zyrtarë policorë, për shkak të tymit pasi një objekt banesor në Fushë Kosovë sot në mesditë u përfshi nga zjarri.

Policia e Kosovës ka thënë për KALLXO.com se për shkak të zjarrit në banesë nuk raportohet për të lënduar.

“Sot rreth orës 12:00, është raportuar se një objekt (banesë) në rrugën Hajrullah Zymi në Fushë Kosovë, është përfshirë nga zjarri. Policia menjëherë ka dalë në vendin e ngjarjes, po ashtu edhe zjarrfikësit”- ka thënë zëdhënësja e Policisë për rajonin e Prishtinës, Florie Ahmeti.

“Nuk raportohet për persona të lënduar, mirëpo si pasojë e problemeve me frymëmarrje (nga tymi) tretman mjekësor kanë pranuar 4 persona (dy nga ta zyrtarë policor)”.

Sipas saj, zjarri është lokalizuar dhe policia ka nisur ndërmarrjen e veprimeve hetimore për sqarimin e plotë të rrethanave që karakterizojnë ngjarjen.