Vetura që ishte në pronësi të kryesuesit të bordit u ble nga Trafiku Urban

Në qershor të vitit të kaluar, një veturë e cila kishte qenë në pronësi të ish-kryesuesit të bordit të ndërmarrjes publike Trafiku Urban, Ruhan Beha, përfundoi në pronësi të kësaj ndërmarrjeje.

Hulumtimi i KALLXO.com zbardh detajet për blerjen e veturës e cila sipas Agjencisë së Regjistrimit Civil, Departamentit për regjistrimin e veturave, vetura e tipit Passat, ngjyrë e zezë e vitit 2009 që nga data 29.04.2015 ishte në pronësi të Ruhan Behës, ish-kryesues i bordit të Trafikut Urban.

Ndërsa, më 25.06.2019 vetura kishte kaluar në emër të një auto-salloni nga Prishtina. Ndërsa, vetëm një ditë më pas, më 26.06.2019 vetura kaloi në pronësi të ndërmarrjes Trafiku Urban.

Këtë e ka konfirmuar në një intervistë për “Kallxo Pernime” edhe ish-anëtari i bordit të drejtorëve të Trafikut Urban, Genc Broqi.

Broqi, i cili ishte edhe kryesues i komitetit të auditimit, ka thënë se në qershor të vitit 2020 kanë dorëzuar një raport të auditimit, ku edhe kanë gjetë se veturë e blerë për nevoja të kryeshefit të Trafikut Urban kishte qenë në pronësi të ish-kryesuesit.

Ai ka thënë se procesi i blerjes së veturës ishte i manipuluar.

“Veturën e vet personale kryesuesi ia ka shitë Trafikut Urban, por nuk është shitë direkt por janë shku me disa metoda për me kamuflu dhe ka shku në prokurim, ai zyrtari nuk ka ditë, mirëpo komplet procesi ka qenë i planifikuar më herët”, ka thënë Genc Broqi.

Tutje, ish-anëtari i bordit ka thënë se ky organ mbikëqyrës nuk kishte dhënë dritën e gjelbër për blerjen e veturës. Ai tha se për të nuk kishte as mjete financiare për ta blerë.

Vetura kishte kushtuar 13 mijë e 390 euro ndërsa sipas Broqit, çmimi real i treguar ishte përgjysmë më lirë.

“Trafiku Urban e ka blerë veturën 13 mijë e diçka, por ne siç e kemi pasë vlerësuar me çmim të tregut, diku ajo veturë bën 6 mijë e 500 euro, dyfish prej çmimit real në treg”, ka thënë Broqi.

Të gjitha procedurat e prokurimit për blerjën e veturës kishin nisur më vonë ndërsa kontrata e tenderit për veturë ishte nënshkruar më 2 tetor 2019.

Lulzim Rexhepaj, kryeshef i ndërmarrjes Trafiku Urban ka thënë se nuk ka qenë në dijeni që vetura të cilën e vozit sot kishte qenë në të kaluarën në pronësi të ish-kryesuesit të bordit, Ruhan Beha.

“Vetura është blerë me procedura të rregullta të prokurimit dhe ne nuk kemi blerë ndonjë person privat por ne kemi blerë nga një operator ekonomik. Unë nuk kam qenë në dijeni që ajo ka qenë në pronësi të ish-kryesuesit, unë nuk përzihem në procedura të prokurimit”, ka thënë Rexhepaj.

KALLXO.com ka provuar ta kontaktojë edhe Ruhan Behën, por kontakti me të ka qenë i pamundur. Ndërsa, përmes telefonit, avokati i tij, Flakron Sylejmani dhe vëllai, Bashkim Beha, kanë deklaruar se nuk janë në dijeni për rastin në fjalë.