Foto: Facebook/ PDK
Veseli: Qeveria Kurti nxiti debatin më të dëmshëm të marrëdhënieve Kosovë-ShBA
Kryetari partisë më të madhe opozitare në vend, PDK-së, Kadri Veseli, ka reaguar, pas deklaratave të senatorit Republikan, David Perdue, për rishikimin e prezencës ushtarake amerikane në vendin tonë.
Sipas Veselit Qeveria Kurti ka nxitur këtë debat të dëmshëm dhe të rrezikshëm.
“Në kohën kur mbështetja e Shteteve të Bashkuara të Amerikës për Kosovën është jetike dhe shumë e domosdoshme, Qeveria aktuale, si asnjë qeveri tjetër e mëparshme, ka nxitur debatin më të dëmshëm dhe më të rrezikshëm të marrëdhënieve Kosovë – ShBA”, ka shkuruar Veseli në Facebook.
Sipas tij deklarata e senatorit Republikan, David Perdue, për rishikimin e prezencës ushtarake amerikane në vendin tonë, është më shumë se serioze.
“Vënia në dyshim e rolit të SHBA-ve nga Qeveria Kurti dhe aleancës sonë të palëkundur me shtetin amerikan, është dëmi më i madh që një i zgjedhur politik i Kosovës, ka arritur t’i bëjë shtetit tonë. Vendosja e Kosovës në udhëkryq të rrezikshëm nacional, i ardhur jo nga ndonjë kërcënim i jashtëm, por nga aktet e pamenduara të vetë Kryeministrit, është shenjë e keqe për vendin tonë”, shkruan ai.
“Pajtohem. Janë 650 trupa amerikane në Kosovë. Koha për t’i kthyer në shtëpi”, tha shkurt Donald Trump Junior.
Sot, David Perdue, senator amerikan, ka kërkuar nga qeveria e Kosovës që sa më shpejt ta largojë tarifën ndaj mallrave Serbisë.
“Për më shumë se dy dekada, forcat amerikane kanë ndihmuar në ruajtjen e paqes mes Kosovës dhe Serbisë. Tani, me përparimin historik në horizont, Kosova duhet të bëjë pjesën e vet dhe të shfuqizojë të gjitha tarifat e vendosura ndaj Serbisë”, ka shkruar në Twitter, senatori Perdue që vjen nga Partia Republikane të cilës i përket edhe Presidenti Donald Trump.
Në të kundërtën senatori Perdue ka kërkuar nga SHBA ta shqyrtojë praninë e saj në Kosovë.
“Nëse Kosova nuk është plotësisht e përkushtuar për paqen, atëherë ShBA duhet të rishqyrtojë praninë e saj atje”, ka theksuar ai.
