Veseli: Formimi i tribunalit ndërkombëtar për gjenocidin dhe krimet e Serbisë është i pashmangshëm

Në Ditën Ndërkombëtare të të Pagjeturve, kryetari i Partisë Demokratike të Kosovës, Kadri Veseli, ka thënë se formimi i tribunalit ndërkombëtar për gjenocidin dhe krimet që Serbia ka kryer në Kosovë është i pashmangshëm.

Veseli është shprehur se Serbia ka përgjegjësi direkte për personat e pagjetur nga lufta e fundit në Kosovë.

“21 vite pas përfundimit të luftës, në listën e personave të pagjetur të Kosovës ende figurojnë edhe 1647 emra. Shteti serb ka përgjegjësinë direkte dhe ende mbanë në ankth shumë familje nga Kosova, duke mbajtur të fshehura shumë informacione që ata i kanë për njerëzit e rrëmbyer e pastaj të vrarë e masakruar”, ka shkruar Veseli në Facebook.

I pari i PDK-së ka thënë se bashkësia ndërkombëtare duhet të bëjë presion te Serbia që krimet të mos vazhdojnë të mbulohen.

“Dhimbja dhe vuajtjet e familjeve dhe të afërmve të viktimave është tejet e madhe. Bashkësia ndërkombëtare duhet të ushtroj trysni, që krimet e kryera nga Serbia të mos vazhdojnë të mbulohen, duke ikur nga përgjegjësitë minimale humane për të pranuar fajin dhe respektuar viktimat”, ka theksuar Veseli.

Edhe presidenti Hashim Thaçi ka përkujtuar 1,647 personat e pagjetur. Çështjen e të pagjeturve Thaçi e ka quajtur turp i bashkësisë ndërkombëtare.