Vazhdojnë protestat në Graçanicë, Policia njofton për bllokim të rrugës kryesore

Arrestimi i një qytetari me nacionalitet serb, Dragisha Millenkoviq, i cili po dyshohet për krime lufte në Kosovë, ka bërë që edhe sot qytetarët serb të paralajmërojnë protestë në Graçanicë.

Lidhur me këtë protestë, Policia e Kosovës ka thënë se me qëllim të mbarëvajtjes së protestës së paralajmëruar, duke filluar nga ora 11:30 e deri në përfundim të protestës, do të ridrejtoj trafikun për automjetet që qarkullojnë nga Prishtina në Gjilan dhe anasjelltas.

Kjo pasi që rruga kryesore në Graçanicë nuk do të jetë e qarkullueshme për trafik deri në përfundim të protestës.

Policia ka thënë se për të përballuar sa më lehtë rrethanat që do të paraqiten në qarkullimin rrugor, kërkojnë ndihmën dhe mirëkuptimin e të gjithë pjesëmarrësve në trafik që përgjatë kohës sa do të zgjatë protesta të shfrytëzojnë rrugët alternative.

Sot është dita e tretë prej kur qytetarët serb protestojnë në Graçanicë pas arrestimit të Millenkoviq, i cili po dyshohet se ka kryer krime lufte në Kosovë gjatë viteve 1998-1999.

Millenkoviq është sjellë më 22 qershor 2023 para Gjykatës së Prishtinës dhe ndaj tij është caktuar masa e paraburgimit prej 30 ditësh.

Policia ka thënë se ndaj Millenkoviq janë siguruar prova për ekzistimin e dyshimit të arsyeshëm se në bashkëkryerje edhe me pjesëtarë të tjerë, gjatë periudhës së luftës në Kosovë në cilësi të personave zyrtar (gardian të burgut) në Prishtinë dhe në paralelen e ndarë nga Prishtina, konkretisht në burgun e Lipjanit, në mënyrë sistematike, dyshohet se kanë ushtruar torturë, dhunë fizike, psikike, keqtrajtime dhe maltretime çnjerëzore dhe të skajshme për jetën ndaj të burgosurve shqiptarë.

Policia kanë kryer edhe kontroll në shtëpinë e të dyshuarit, ku në cilësi të provave materiale janë sekuestruar një armë zjarri, 136 fishekë, një thikë ushtarake, një shumë metalike, dokumente, vendime, shënime dhe një telefon personal dhe gjëra të tjera të cilat do të përdoren gjatë trajtimit të rastit.