Ukraina kërkon më shumë armë derisa sulmet ruse vazhdojnë
Ministri i Jashtëm i Ukrainës, Dmytro Kuleba, akuzoi NATO-n se “nuk po bën asgjë” përballë pushtimit rus të vendit të tij.
Duke folur në Forumin Ekonomik Botëror në Davos, Kuleba e vlerësoi BE-në për vendimet e saj “revolucionare” për ta mbështetur Kievin, por tha se aleanca ushtarake e NATO-s është “plotësisht mënjanë”.
Ukraina është lutur sërish për më shumë armë, duke përfshirë sisteme të shumta raketash që të përputhen me fuqinë e zjarrit ruse.
“Ne kemi nevojë për ndihmën e partnerëve tanë – mbi të gjitha armët për Ukrainën. Ndihmë e plotë, pa përjashtime, pa kufij, mjafton për të fituar”, tha presidenti Volodymyr Zelenskiy në fjalimin e tij kombëtar. Kuleba shtoi se vendit të tij “në mënyrë të dëshperueshme” i duhen sisteme të shumta raketash që të përputhen me fuqinë e zjarrit rus.
Presidenti ukrainas, Vlodymyr Zelenskyy e ka hedhur poshtë nocionin se vendi i tij duhet të japë territor për të bërë paqe me Rusinë.
“Editoriale simptomatike filluan të shfaqen në disa media perëndimore duke thënë se Ukraina duhet t’i pranojë të ashtuquajturat kompromise të vështira duke hequr dorë nga territori në këmbim të paqes”, tha ai në fjalimin e tij të fundit të natës. Ata që e këshillojnë Ukrainën të heqë dorë nga territori nuk arrijnë t’i shohin njerëzit e zakonshëm, të cilët në fakt jetojnë në territorin që ata propozojnë ta shkëmbejnë me iluzionin e paqes”, tha ai.
Këshilltari presidencial Oleksiy Arestovych shtoi: “Askush nuk do të tregtojë një gram të sovranitetit tonë ose një milimetër të territorit tonë. Fëmijët tanë po vdesin, ushtarët po eksplodohen nga predha dhe ata na thonë të sakrifikojmë territorin. Hiquni qafe. Nuk do të ndodhë asnjëherë.”
Ministria e Jashtme e Ukrainës tha se plani i Moskës për ta thjeshtuar procesin e dhënies së shtetësisë ruse për banorët e rajoneve të pushtuara nga Rusia të Ukrainës, shkel ligjin ndërkombëtar.
Deklarata e ministrisë erdhi pasi presidenti i Rusisë, Vladimir Putin, nënshkroi një dekret që thjeshton procesin e dhënies së shtetësisë ruse për banorët e rajonit ukrainase të Kherson dhe Zaporizhzhia të pushtuara nga Rusia.
Forcat ruse kanë nisur sulme të reja në qytete në Ukrainën lindore, me qytetin e Sievierodonetsk gjithnjë e më shumë në rrezik për t’i rrethuar plotësisht. Guvernatori i rajonit të Luhanskut, Serhiy Haidai, tha se zona tani ishte pa furnizime me gaz dhe kishte ujë dhe energji të kufizuar pasi u godit stacioni i fundit i furnizimit me gaz.
Policia në Lysychansk po mbledh trupat e njerëzve të vrarë për t’i varrosur në varre masive, tha guvernatori rajonal i Luhansk, Serhiy Gaidai. Rreth 150 njerëz janë varrosur në një varr masiv në një lagje Lysychansk, shtoi ai, raporton Reuters.
Ligjvënësit rusë kanë votuar miratimin e një ligji të ri që do t’i eliminojë kufijtë e moshës për ushtarët me kontratë ushtarake.
Ekspertët ushtarakë thonë se Rusia përballet me humbje të paqëndrueshme të trupave dhe pajisjeve në Ukrainë pas një sërë pengesash ushtarake që e kanë detyruar Moskën t’i reduktojë qëllimet e saj të luftës. Zelenskiy u përgjigj: “(Ata) nuk kanë më mjaft të rinj, por ata ende kanë vullnetin për të luftuar.”
Një zyrtar i lartë i Kombeve të Bashkuara do ta vizitojë Moskën në ditët në vijim për të diskutuar mbi ringjalljen e eksporteve të plehrave, tha ambasadori rus në OKB Vassily Nebenzia, duke theksuar se bisedimet nuk ishin të lidhura me një rifillim të dërgesave të grurit ukrainas, raportoi Reuters.
Dy luftëtarë të dyshuar të grupit ëagner nga Bjellorusia janë akuzuar për vrasjen e civilëve pranë Kievit, duke i bërë ata mercenarët e parë ndërkombëtarë që përballen me akuzat për krime lufte në Ukrainë. Prokurorët ukrainas i kanë publikuar emrat dhe fotografitë e tetë burrave të kërkuar për krime të dyshuara lufte – përfshirë vrasje dhe tortura – në fshatin Motyzhyn. Disa besohet se kanë luftuar në Siri.
Zëvendësministri i Jashtëm i Rusisë, Andrei Rudenko, tha se Moska është e gatshme ta sigurojë një korridor humanitar për anijet që transportojnë ushqime nga Ukraina, në këmbim të heqjes së disa sanksioneve. Portet e Detit të Zi të Ukrainës janë bllokuar që nga pushtimi i Rusisë, me më shumë se 20 milionë tonë drithë të ngecur në kapanone në vend. Ministri i Jashtëm ukrainas, Dmytro Kuleba, e ka përbuzur pretendimin e Moskës dhe e ka akuzuar Rusinë se po përpiqet ta “shantazhojë botën”.
Kryeministrja e Estonisë Kaja Kallas tha se është “shumë më e rrezikshme t’i dorëzohesh Putinit sesa ta provokosh atë” gjatë një fjalimi në Stokholm dhe paralajmëroi: “Të gjitha këto koncesione në dukje të vogla ndaj agresorit çojnë në luftëra të mëdha. Ne e kemi bërë këtë gabim tashmë tri herë: Gjeorgjia, Krimea dhe Donbasi”.
Zëdhënësja e Ministrisë së Jashtme të Rusisë, Maria Zakharova, tha se një plan paqeje italian për Ukrainën ishte një “fantazi”. Zakharova tha në konferencën e saj javore: “Nuk mund ta furnizoni Ukrainën me armë me njërën dorë dhe të dilni me plane për një zgjidhje paqësore të situatës me dorën tjetër”./The Guardian
