Talat Xhaferi zyrtarisht zgjedhet kryeministri i parë shqiptar në Maqedoninë e Veriut
Talat Xhaferi edhe zyrtarisht është zgjedhur kryeministri i parë shqiptar në Maqedoninë e Veriut, duke hyrë kështu në historinë moderne të Maqedonisë.
Xhaferi u zgjodh me 65 vota të deputetëve, nga 68 gjithsej sa votuan. Tre ishin kundër dhe asnjë nuk abstenoi.
Xhaferi mbajti një fjalim para deputetëve në Kuvend, duke thënë se prioritet i Qeverisë së tij do të jetë bashkëpunimi me BE-në, NATO-n dhe ShBA-të.
“Bashkëpunimi me BE-në, NATO-n dhe SHBA-të do të jetë gjithashtu prioritet për mua dhe qeverinë timeUnë do të vazhdojë programin e qeverisë së kaluar duke realizuar prioritetet e qytetarëve dhe të qeverisë. Për të ecur drejt rrugës së BE-së ne do të bëjmë hapat e duhura dhe të sigurta që i takon një shteti serioz” – tha Xhaferi.
Pak para se të fillonte seanca në Kuvendin e Maqedonisë së Veriut për zgjedhjen e Xhaferit kryeministër, kryetari i BDI-së, Ali Ahmeti ka thënë se të gjithë të pranishmëve në Kuvend ju shkëlqejnë sytë nga gëzimi.
“Të gjithë që i kam takuar deri tani, ju shkëlqejnë sytë nga gëzimi. Është ditë për të ju gëzuar. Nuk është ky sukses i vogël, që shqiptarët për një çerek shekulli të arrijnë gjithë këto të mira kombëtare. T’i kishe thënë dikujt para 20 vjetësh se kjo do të bëhet realitet, do të sugjeronte terapi neuropsikiatrike”-tha mes tjerash Ahmeti.
Në zgjedhjet parlamentare të vitit 2020, Bashkimi Demokratik për Integrim që drejtohet nga Ali Ahmeti garoi me sloganin “Për kryeministrin e parë shqiptar”, ndërsa kandidat të saj kishte juristin dhe ish-politikanin Naser Ziberi.
Meqë zgjedhjet ishin fituar nga Lidhja Social Demokrate, kryeministër ishte zgjedhur Zoran Zaev, që atëkohë drejtonte LSDM-në.
Por, për të përmbushur premtimin e BDI-së, Zoran Zaev dhe Ali Ahmeti në marrëveshjen për bashkëqeverisje ishin pajtuar që në 100 ditët e fundit të punës së Qeverisë, kryeministër të caktohet një kandidat i propozuar nga Bashkimi Demokratik për Integrim.
Qeveria që drejtohej nga Dimitar Kovaçevski, më 25 janar e dorëzoi dorëheqjen në Kuvend, ndërsa këtë e bëri edhe Talat Xhaferi, në cilësinë e kryetarit të Kuvendit, për t’u hapur rrugën procedurave për kalimin e tij në krye të Qeverisë teknike.
Xhaferi: Bashkëpunimi me BE-në, NATO-n dhe ShBA-të do të jetë prioritet i Qeverisë time
