Skocia bëhet vendi i parë që jep falas produktet higjienike menstruale
Skocia është bërë vendi i parë që ka bërë falas dhe universale produktet menstruale në objektet publike, shkruan CNN.
Parlamenti Skocez dje votoi unanimisht në favor të projektligjit për produktet menstruale, pasi ligjvënësit fillimisht kishin sinjalizuar mbështetjen e tyre.
Kjo do të thotë që produktet e ciklit menstrual do të jenë në dispozicion për t’u përdorur në ndërtesat publike, duke përfshirë shkollat dhe universitetet në të gjithë Skocinë.
Sipas rregullave të reja, do të varet nga autoritetet lokale dhe ofruesit e arsimit për të siguruar që produktet të jenë në dispozicion falas.
“Fushata është mbështetur nga një koalicion i gjerë, duke përfshirë sindikatat e tregtisë, organizatat e grave dhe organizatat bamirëse,” tha Monica Lennon, ligjvënësja që prezantoi ligjin vitin e kaluar, përpara votimit.
Pas votimit, Lennon tha se vendimi ishte “një sinjal për botën që mund të arrihet qasja e lirë universale në produktet e ciklit menstrual.”
Memorandumi shoqërues financiar i projekt-ligjit vlerëson se mund të kushtojë rreth 8.7 milionë paund në vit deri në 2022, në varësi të numrit të grave që do të përfitojnë nga produktet falas.
Në një dokument që mbështet legjislacionin, Lennon tha se ishte e arsyeshme të pritej marrja e 20% të skemës duke pasur parasysh faktin se statistikat zyrtare të pabarazisë tregojnë se gati 20% e grave në Skoci jetojnë në varfëri relative.
Ligji i ri u vlerësua nga një numër grupesh të barazisë dhe të drejtave të grave si dhe politikanë nga të gjitha partitë e përfaqësuara në parlamentin akocez.
Një në 10 vajza në Mbretërinë e Bashkuar nuk kanë qenë në gjendje të përballojnë produkte të ciklit menstrual sipas një sondazhi të vitit 2017 nga Plan International UK.
