Refugjati gjendet i vdekur dhe i rrethuar nga minjtë në kampin grek

Në një kamp refugjatësh në ishullin grek të Chios në fillim të kësaj jave, një i ri vdiq i vetëm në një tendë. Në kohën që rojet mbërritën në vendngjarje, rreth 12 orë pas vdekjes së refugjatit somalez, trupi ishte rrethuar nga minjtë.

Azilkërkuesit të cilët fillimisht kishin paralajmëruar stafin folën të tmerruar  kur panë minjtë  që grumbulloheshin.

Ngjarja ndodhi të hënën e Pashkëve Ortodokse, një festë kombëtare në Greqi.

28-vjeçari, i cili nuk është përmendur nga autoritetet greke, mendohet se ka vdekur për shkaqe natyrore.

Në një deklaratë të shkurtër, ministria greke e migracionit tha se “njeriu i pafat” u gjet nga një mjek ushtarak dhe  kishte kafshime në vesh dhe në dorë.

“Shkaku i saktë i vdekjes do të bëhet i njohur nga autopsia që do të kryhet.”

Megjithëse ishte një refugjat i regjistruar, somalezit iu kërkua të qëndronte në kampin e refugjatëve në kodrën Vial në Chios për shkak të kufizimeve të Covid-19.

“Ne i presim dhe i ushqejmë sepse janë njerëz, ne nuk mund t’i dëbojmë”, tha guvernatori i kampit, Panagiotis Kimourtzis, për The Guardian.

“Është logjike që të shfaqen minjtë kur dikush qëndron shumë orë i vdekur.”

Kampi u ndërtua në vitin 2016.