Qytetarët ankohen se rruga për Brezovicë është e mbuluar nga bora, Ministria thotë se e kanë pastruar

Reshjet e borës e kanë vështirësuar qarkullimin rrugor në pjesë të ndryshme të Kosovës.

Një vështirësi e tillë sipas qytetarëve po shihet të jetë edhe në rrugët për në Brezovicë, ani pse sipas Ministrisë së Mjedisit, Planifikimit, Hapësinor dhe Infrastrukturës rrugët janë të pastruara.

Sipas disa videove të dërguar në redaksi të KALLXO.com, shihet se gjendja nuk është ashtu siç po thonë nga MMPHI-ja.

KALLXO.com ka kontaktuar me shefin e Departamentit të Mirëmbajtjes së Rrugëve, Gëzim Osmani, i cili ka thënë se rrugët janë të pastruara.

“Rrugët janë të pastruara”, ka thënë Osmani për KALLXO.com.

Ai po ashtu ka dërguar edhe disa fotografi duke shtuar se në to shihet gjendja e rrugëve në mëngjesin e sotëm.

“Kjo gjendje ka qenë në orën 09:00, tash shumë më mirë është”, tha Osmani.

I njëjti ka treguar se kompania që bënë pastrimin e rrugëve në zonën e Brezovicës ka kërkuar ndihmë edhe nga Policia e Kosovës në drejtim të automjeteve që kalojnë në këto rrugë.

“Kompania e ka thirrur Policinë që me shku me i drejtu kamionët, autobusët e veturat e tjera”, tha Osmani.

Ndër të tjera, ai shtoi se rrugët janë të kalueshme nëse qytetarët që duan të vizitojnë këtë vend turistik janë të pajisur me guma të dimrit dhe me zinxhirë.

“Rrugët janë të kalueshme, por me goma të dimrit dhe me zinxhirë [..]. Qytetarët nuk mundën me shku me goma të verës atje”, përfundoi Osmani.