Policia jep detaje për vrasjen e djeshme në Lipjan
Policia e Kosovës i ka arrestuar dy të dyshuar për vrasjen e rëndë që ka ndodhur pasditen e djeshme në Lipjan.
Tre persona ishin përfshirë në një përleshje fizike, ku më pas një person pas lëndimeve të rënda ka vdekur në QKUK.
Rasti ka ndodhur në rrugën “Lidhja e Prizrenit” në qytetin e Lipjanit, rreth orës 15:09.
“Janë arrestuar dy të dyshuar të cilët pas një përleshje fizike që kishin pasur me viktimën me ndonjë mjet të mprehtë e kishin goditë atë i cili si pasojë e lëndimeve kishte ndërruar jetë në QKUK”, thuhet në raportin e policisë.
Ndërkaq, si pasojë e rastit edhe dy të dyshuarit kanë pranuar tretman mjekësor.
Në vendin e ngjarjes kanë dalë njësitë policore dhe prokurori i shtetit, përderisa nga njësiti përkatës policor është gjetur dhe konfiskuar një thikë.
Sipas PK-së, të dyshuarit pas intervistimit me vendim të prokurorit janë dërguar në mbajtje, ndërsa trupi i pajetë i viktimës dërgohet në Institutin e Mjekësisë Ligjore për obduksion, si dhe rasti vazhdon të hetohet.
Këtë javë, opinioni publik u trondit edhe nga një vrasje e dyfishtë që ndodhi në Prishtinë, për arsye pronësore.
www.kallxo.com