Pas prishjes se koalicionit me LDK-në në Vushtrri, reagon LVV
Koalicioni qeverisës mes Lidhjes Demokratike dhe Lëvizjes Vetëvendosje në Vushtrri është prishur dje. Këtë e ka njoftuar kryetari i kësaj komune, Xhafer Tahiri. Ai ka thënë se ky koalicion është prishur për shkak se Vetëvendosje në Vushtrri nuk ka votuar planin për Rimëkëmbje Ekonomike.
Xhaferi po ashtu ka bërë të ditur se nuk do të bëjnë koalicion me asnjë parti tjetër dhe se qeverisjen në këtë komunë LDK do ta vazhdojë e vetme.
Kurse sot kanë reaguar Lëvizja Vetëvendosje në Vushtrri. Ish drejtori i Drejtorisë së Ekonomisë në Vushtrri, Miran Halili.
Ai në emër të LVV-së ka thënë se argumentet e Tahirit për mos-votimin e Planit për Rimëkëmbje Ekonomike janë të paqëndrueshme.
“Argumentet e prezantuara nga Xhafer Tahiri kinse për mos-votimin e ‘Planit për Rimëkëmbje Ekonomike’ të Vushtrrisë janë krejtësisht të paqëndrueshme. Ky votim është vetëm shkas i një përcaktimi të mëhershëm, madje jo nga z. Tahiri, por niveli qendror i LDK-së e kryetari Isa Mustafa.”, thuhet në reagimin e LVV.
Madje ky subjekt politik thotë se ka mbështetur unanimisht ndarjen e mjeteve për këtë projekt .
“Në seancën e djeshme, Lëvizja VETËVENDOSJE! kërkoi që kjo pikë e rendit të ditës të shtyhet për një mbledhje të radhës, ku ‘Plani i Rimëkëmbjes’ do të plotësohej me projektet për të cilat Komuna ka paguar 140.000 €, dhe jo të vinte një material gjysmak, pa përmbajtje konkrete, ku “projektet” paraqiten me pak fjalë, pa asnjë detaj dhe vetëm si koncepte, kryesisht të marrura copy-paste, pa asnjë analizë profesionale. Kjo tendencë për të kaluar këtë plan me nguti dhe pa analizë, për Lëvizjen VETËVENDOSJE! – Qendra Vushtrri e bën tejet iniciativë të dyshimtë. Kësisoj ne i bëjmë thirrje Prokurorisë së Shtetit të hetoi këtë çështje! Kërkesa jonë ishte parimore dhe e drejtë: parat e paguara nga buxheti komunal, të mos paguhen në projekte të cilat nuk përmbushin as minimumin e asaj për çfarë janë kontraktuar.”, thuhet në reagimin e LVV-së./RTV21
