Behgjet Pacolli - Foto: REL/EPA-EFE
Pacolli dorëzon në Prokurori dokumente të krimeve të Serbisë në Kosovë
Ministri në detyrë i Punëve të Jashtme, Behgjet Pacolli, ka dorëzuar në Prokurori dosjet për krimet e luftës dhe gjenocidin serb kundër shqiptarëve në Kosovë.
Këtë e ka bërë të ditur këshilltari i Pacollit, Jetlir Zyberaj, në rrjetin social ‘Facebook’.
”Këto dosje paraqesin fakte dhe dëshmojnë se Serbia kishte një politikë shtetërore të orkestruar gjenocidale kundër Kosovës e cila ishte në terren e zbatuar nga ushtria jugosllave, MUP-i, grupet paramilitare të kontrolluara nga Beogradi dhe grupet e tjera lokale të armatosura serbe që kryenin spastrimin etnik dhe vrasjet masive”, ka shkruar Zyberaj.
Me 10 dhjetor, Pacolli e ka paralajmëruar dorëzimin e 10 mijë faqeve dokumente në krimeve të Serbisë në Kosovë.
“Sot pasi kam marrë kontakt me organet e prokurorisë, të depozitojë 10 mijë faqe materiale për krimet e Serbisë në Kosovë. Materiale që e përshkruajnë ngjarjet në detaje. Janë dokumente që aty, nuk janë trajtu asnjëherë, sipas informata që kam, diku 95% e kriminelëve që janë përmendur në këto dokumente, lëvizin lirshëm”, kishte thënë ai.
“Pavarësisht se çfarë, unë jam i gatshëm të dëshmoj në Gjykatën Speciale në Hagë dhe unë kam tonelata materiale që më së miri tregojnë se kush kë e dëboi nga Kosova”, ka thënë Daçiq për Novosti, raporton b92.
Në anën tjetër, më 5 dhjetor, presidenti serb, Aleksandar Vuçiq, e ka quajtur trillim masakrën e Reçakut.
Kjo pasi qe Gjykata në Prishtinë e ka dënuar me dy vjet burg ish-ministrin e Administrimit të Pushtetit Lokal, Ivan Todosijeviq.