Prapa grilave - Ilustrim
Një muaj paraburgim për burrin që rrahu gruan e tij
Sot është caktuar masa e paraburgimit ndaj të pandehurit B. I., i cili dyshohet për veprën penale ”lëndim i lehtë trupor”.
Lajmin e ka bërë të ditur Gjykata Themelore në Ferizaj përmes një komunikate ku tutje është theksuar se ”pas mbajtjes së seancës dëgjimore dhe analizimit të shkresave të lëndës, gjyqtari i procedurës paraprake i Divizionit Penal – Imri Sejda, ka vërtetuar faktin se ekziston dyshimi i bazuar mirë, se më 21.05.202 në shtëpinë e tyre në një fshat në Ferizaj, i shkakton lëndime trupore të dëmtuarës –bashkëshortes së tij V. I., në atë mënyrë që fillimisht e kap për flokë duke e ngreh zvarrë prej oborrit deri në shtëpi dhe pasi që e ka futur në shtëpi e ka goditur me grushte dhe shqelma në të gjitha pjesët e trupit duke i shkaktuar lëndime trupore të përshkruar si në Raportin Mjekësor të Spitalit të Përgjithshëm Qendra Emergjente në Ferizaj”.
Ndërkaq, mbrojtësit e të pandehurit mendonin se këtij të fundit ti caktohej ndonjë masë më e butë në një mënyrë që do ti pamundësohej të njëjtin që të përsërisë veprën penale.
Mirëpo, gjykata ka vlerësuar se aplikimi i masave më të buta siç është arresti shtëpiak, por edhe i masave tjera, nuk është i mjaftueshëm për të pamundësuar që i pandehuri të mos kryej vepra penale të tilla apo të ngjashme.
Me këtë rast palët njoftohen se ankesa kundër këtij aktvendimi nuk e shtynë ekzekutimin e tij.