Ministri Murati i reagon presidentes Osmani pas kërkesës për pezullimin e tarifave doganore për produktet amerikane
Ministri i Financave, Hekuran Murati, ka reaguar pas kërkesës së presidentes Vjosa Osmani drejtuar Qeverisë për pezullimin e tarifave ndaj produkteve me origjinë nga Shtetet e Bashkuara.
Ministri Murati ka thënë se kërkesa e presidentes Osmani në adresë të Qeverisë ishte dërguar pas orarit të punës.
Në reagimin e tij Murati ka thënë se këto çështje shteti i trajton larg mediave, dhe publiku njoftohet kur të merret vendimi.
“Sot pas orarit të rregullt të punës, në lajme lexova që Presidentja e vendit i paska bërë kërkesë Qeverisë që të pezullojë tarifat ndaj produkteve me origjinë nga ShBA-të. Kërkesa në email ishte dërguar në adresë të Qeverisë në 17:39, ndërkaq kjo gjë ishte bërë publike në rrjetin social X në 17:42, veç 3 minuta më vonë” – ka shkruar ai.
“Secili shtet serioz, këto çështje i trajton larg mediave, dhe publiku njoftohet kur të merret vendimi. Për më tepër, politikat fiskale bien në fushëveprimin e ekzekutivit, konkretisht ministrisë përgjegjëse për financa”- ka shtuar ministri Murati.
Ai ka thënë se qysh në prill të vitit 2023, gjatë vizitës në Washington DC, bashkë me zëvendëskryeministrin Besnik Bislimi kanë takuar përfaqësues të Departamentit të Tregtisë, me të cilët kanë diskutuar ndër të tjera edhe temën e një marrëveshjeje për tregti të lirë me SHBA-në.
Sipas tij, çështja e marrëveshjes për tregti të lirë është përsëritur nga kryeministri Kurti edhe në takimet që ka zhvilluar me ish-ambasadorin amerikan Jeff Hovenier.
Gatishmëria jonë si qeveri dhe si shtet, siç ka thënë më tej Murati, për të pasur tregti të lirë e pa asnjë barrierë tarifore apo jotarifore me Shtetet e Bashkuara të Amerikës, vazhdon të qëndrojë edhe më tej.
Ministri Murati ka shtuar se gjatë ditës së djeshme kanë diskutuar me kryeministrin në lidhje me implikimet e mundshme që ka vendimi i presidentit Trump për vendosjen e tarifave ndaj të gjitha shteteve me të cilat SHBA ka raporte tregtare.
“Fatmirësisht, Kosova bën pjesë në grupin e shteteve që u është vendosur shkalla tarifore minimale prej 10%. Marrë parasysh edhe vëllimin e vogël tregtar që kemi, impakti financiar i pasjes apo jo të një regjimi tarifor ka ndikim të vogël në ekonominë tonë. Gjithsesi, si partnerë e aleatë të përhershëm, synimi ynë është që të rritet vëllimi i këmbimit tregtar, dhe e mbështesim plotësisht parimin e Presidentit Trump për tregti të lirë e pa barriera dhe fer”- ka thënë ministri Murati, duke shtuar se kjo mund të arrihet përmes një marrëveshjeje për tregti të lirë, që do të shërbente edhe si një shkallë shtesë drejt ngritjes e forcimit të marrëdhënieve të forta që tashmë ekzistojnë.
Ai ka bërë të ditur se Qeveria e shqyrton çështjen e pezullimit të tarifave ndaj importeve amerikane.
“Dhe kurdo që merret një vendim patjetër që do t’ju njoftojmë me kohë”- ka përfunduar ministri Murati.
Presidentja Vjosa Osmani i kërkoi sot, më 03.04.2025, Qeverisë së Kosovës që të pezullojë tarifat e importit për të gjitha produktet amerikane.
Kërkesa e Osmanit vjen një ditë pasi presidenti i SHBA-së, Donald Trump, njoftoi për tarifat e reja doganore ndaj vendeve me të cilat Shtetet e Bashkuara kanë marrëdhënie tregtare, përfshirë edhe Kosovën.
Presidenti i SHBA-së, Donald Trump, nënshkroi më 02.04.2025 urdhrin për tarifat e reja doganore ndaj vendeve me të cilat SHBA ka marrëdhënie tregtare, përfshirë Kosovën.
Mallrat kosovare që hyjnë në SHBA sipas këtij urdhri do të tariforen në masën 10 %.
