Këshilltari i Departamentit amerikan të Shtetit: Diskutuam me Kurtin për shtyrjen e zbatimit të rregullave të reja për targat
Këshilltari i Departamentit të Shtetit të SHBA-së, Derek Chollet, ka thënë se me kryeministrin e Kosovës, Albin Kurtin, kanë folur edhe për shtyrjen e zbatimit të vendimit për targat serbe të automjeteve që përdoren nga qytetarët serbë të Kosovës.
Për këtë bisedë para Chollet njoftoi edhe shefi i ekzekutivit të vendit, por ai nuk e përmendi nëse targat kanë qenë pjesë e bisedës së tyre.
“Fola me kryeministrin e Kosovës Albin Kurti sot për të diskutuar rëndësinë e shmangies së tensioneve dhe shtyrjes së zbatimit të rregullave të reja të targave, pa konfiskime apo gjoba” – ka thënë Chollet.
Tutje ai tha se gjithashtu është diskutuar edhe për partneritetin mes dy vendeve dhe synimet e përbashkëta për avancimin e integrimeve evropiane dhe euroatlantike të Kosovës.
Në anën tjetër, në njoftimin e kryeministrit u tha se Kurti kishte falënderuar Chollet për mbështetjen e vazhdueshme për Kosovën për integrimin euroatlantik.
Tutje, Kurti kishte thënë se Kosova përsëri dëshmon se sundimi i ligjit shkon krah për krah me paqen, sigurinë dhe demokracinë.
Sipas tij kjo tregohet në Projektin Botëror të Drejtësisë, Raporti i vitit 2022, ku Kosova është renditur e para në Ballkanin Perëndimor dhe e dyta në botë që ka shënuar përmirësim në fushën e sundimit të ligjit.
Mirëpo, në njoftimin e Kurtit nuk ishin dhënë detaje shtesë.
Spoke w/ Kosovo PM @albinkurti today to discuss the importance of avoiding tension & postponing the implementation of new license plate rules, without confiscations or fines. Also discussed our partnership & shared goals of advancing Kosovo’s European & Euro-Atlantic integration.
— Derek Chollet (@CounselorDOS) October 27, 2022
