I shumëkërkuari në rastin e kazinove në Karaçevë lirohet nga paraburgimi

Mentor Maqani është liruar nga paraburgimi. I njëjti ka qenë në paraburgim nën dyshimin se ka kryer veprat penale – organizim i lojërave të fatit dhe kontrabandë.

KALLXO.com mëson se i njëjti është liruar gjatë ditës se sotme.

Mentor Maqani ka qenë i kërkuar për më shumë se dy muaj nga organet e drejtësisë nën dyshimet për organizim të lojërave të fatit dhe kontrabandë.

I njëjti u është dorëzuar para disa ditëve organeve të drejtësisë.

Siç kishte mësuar KALLXO.com avokati i Maqanit kishte njoftuar Policinë se klienti i tij gjendej në QKUK pasi kishte probleme shendetësore.

Kujtojmë se Maqani edhe vitin e kaluar kur ishte arrestuar nën dyshimin për fajde dhe detyrim, kohën më të madhe e kishte kaluar në QKUK për shkak të problemeve shëndetësore.

Maqani mendohej të dërgohej në Burgun e Sigurisë së Lartë pas marrjes së trajtimit mjekësor në QKUK. Aty do të mbante paraburgimin për veprat që dyshohej.

Maqani ka qenë një nga të dyshuarit në listën e personave të cilët kanë funksionuar në zonën e Karaçevës, vend ky i cili gjendet në komunën e Kamenicës vetëm pak kilometra larg kufirit mes Kosovës dhe Serbisë.

Pas arrestimit të Maqanit seanca për caktimin e masës së paraburgimit për të njëjtin ishte mbajtur në QKUK.

KALLXO.com vazhdimisht ka raportuar në lidhje me rastin e Karaçevës por edhe rastin për të cilën ishte arrestuar Maqani vitin e kaluar.

I shumkërkuari i kazinove Mentor Maqani pas trajtimit në QKUK do të dërgohet në Burgun e Sigurisë së Lartë