Lirohen nga paraburgimi 10 të arrestuar në rastin Karaçeva

Dhjetë persona kanë pranuar që të bashkëpunojnë me Prokurorinë Themelore në Gjilan dhe në anën tjetër kanë pranuar veprat të cilat u janë ngarkuar në lidhje me rastin e aksionit të gjerë i cili ndodhi në shtator në fshatin Karaçevë.

Nga dhjetë të cilët janë liruar, tre nga ta janë edhe zyrtarë policor. Lajmin e ka konfirmuar për KALLXO.com, prokurorja e rastit Rozelida Manastiri.

“Po kam kërkuar ndërprerjen e masës së paraburgimit për dhjetë të tjerë të arrestuar në rastin e Karaçevës. Kjo pasi që të njëjtit kanë pranuar marrëveshjet, fajësinë si dhe kanë pranuar të bashkëpunojnë me prokurorinë për të zbardhur lidhjet por edhe për të zbardhur rrjetin i cili funksiononte në zonën e Karaçevës me kazino ilegale dhe kontrabandë”, tha prokurorja Manastiri për KALLXO.com.

Gjithashtu prokurorja Manastiri ka bërë kërkesë për paraburgim edhe për B. G., i cili u dorzua gjatë ditës së djeshme në prokurori ndërsa ishte në kërkim që nga 18 shtatori kur edhe filloi aksioni në zonën e Karaçevës.

KALLXO.com gjatë ditës së djeshme raportoi për dorëzimin e B. G., i cili sipas prokurorisë dyshohet se është pronari i njërës nga kazinot ilegale që funksiononte kundër ligjit në Karaçevë.

Me të dorëzuarin e fundit, numri i të arrestuarve në lidhje me rastin në Karaçevë ka mbërri në 67.

Nga totali i të arrestuarve ndër ta janë edhe 12 zyrtarë policor të cilët dyshohen se kishin mundësuar që të zhvillohej kontrabanda në zonën e cila konsiderohej për një kohë të gjatë si e paprekur, pra zona e Karaçevës e cila gjendet vetëm pak kilometra larg vijës kufitare mes Kosovës dhe Serbisë.

Përveç të arrestuarve në dy aksione të ndara, u konfiskuan një mori provash e materialesh të cilat janë përdorur dhe do të përdorën në proceset gjyqësore ndaj të arrestuarve.