I akuzuari s’vjen në gjykatë, mendon se gjykimi mund të zhvillohet pa të
Ka dështuar seanca gjyqësore ndaj Agim Shishanit, rojtar i pyllit, i akuzuar për keqpërdorim të detyrës zyrtare.
Shkak për shtyrjen e kësaj seance ishte se i akuzuari Shishani nuk e ka ditur se gjykimi ndaj tij nuk mund të zhvillohet pa praninë e tij.
Ai gjithashtu ka menduar se dëshmitarët mund të dëgjohen pa praninë e tij.
Të pranishëm ishin dëshmitarët Mehmet Gërguri, Lulzim Murati të cilët e njoftuan trupin gjykues.
‘’Agim Shishani nuk do të marrë pjesë sot se kemi mu dëgju vetëm ne’’, tha dëshmitari Mehmet Gërguri.
Sipas aktakuzës, Agim Shishani në cilësinë e rojtarit të pyjeve për rajonin e Fushë Kosovës nga fillimi i muajit janar e deri në muajin gusht të vitit 2017, nuk e ka përmbushur obligimin e tij për t’i ruajtur pyjet në Gospojë dhe Grabovc, ku ka ndodhur prerja ilegale e pyjeve në dëm të përgjithshëm prej 478, 93 metër kub drunj, në vlerë prej 43,103.70 euro.