Gjykata Speciale prezanton vendimet dhe zhvillimet e fundit, çka u vendos për Nasim Haradinajn?

Angela Griep, zëdhënëse e Dhomave të Specializuara në Hagë, në konferencën për media prezantoi zhvillimet dhe proceset aktuale në këtë Gjykatë.

Më 12 tetor 2023, kryetarja e Dhomave të Specializuara, gjykatësja Ekaterina Trendafilova, ka marrë disa vendime të rëndësishme.

Së pari, Trendafilova ka vendosur të modifikojë dënimin e Hysni Gucati, duke i dhënë lirinë, por me disa kushte. Këto kushte do të aplikohen gjatë pjesës së mbetur të dënimit të tij nga paneli i Gjykatës së Apelit.

Siç u bë e ditur, Gucati ka mbërritur në Kosovë më 17 tetor 2023.

Po më 12 tetor, kryetarja ka vendosur të shqyrtojë modifikimin e dënimit të Nasim Haradinajt.

Vendimi është marrë pasi administratorja, Fidelma Donlon, raportoi për sjelljen e Haradinajt gjatë qëndrimit të tij në objektin e paraburgimit të DHSK-së.

Megjithëse janë konsideruar faktorë të ndryshëm që mund të favorizojnë modifikimin e dënimit të tij, kryetarja ka theksuar se Nasim Haradinaj ka precedentë disiplinorë në Njësinë e Paraburgimit. Prandaj, ajo ka urdhëruar që të paraqitet një raport i ri në lidhje me sjelljen e Haradinajt në të ardhmen, në kontekst të vendimit për modifikimin e dënimit të tij.

Në të njëjtën ditë, versionet e redaktuara publike të aktakuzave të konfirmuara kundër Sabit Januzit dhe Ismet Bahtjarit, të datës 2 tetor, janë bërë publike, shtuar me versionin e redaktuar të vendimit për fletarrestimet dhe urdhrat për transferim më 13 tetor.

Griep tutje ka njoftuar se gjykatësi i procedurës paraprake ka vendosur në të njëjtën datë që gjuha zyrtare në këtë çështje gjyqësore do të jetë anglishtja, pas pajtimit të të gjitha palëve. Kjo do të thotë që palët dhe pjesëmarrësit do të duhet të dorëzojnë parashtrimet e tyre në anglisht.

Në rast se shtojcat, materialet mbështetëse ose provat e tjera janë në një gjuhë tjetër, ato duhet të përkthehen. Parashtrimet e protokolluara dhe materialet e tjera do të përkthehen në gjuhët zyrtare të Gjykatës, si në gjuhën shqipe, serbisht dhe anglisht, në përputhje me rregullat e përkthimit sipas Ligjit dhe Rregullores së Procedurës dhe Provave.

Në çështjen gjyqësore të Hashim Thaçit dhe të bashkakuzuarve të tij, trupi gjykues, më 16 tetor ka vendosur të vazhdojë paraburgimin e Hashim Thaçit dhe Kadri Veselit.

Vendimi është marrë pasi trupi gjykues ka vlerësuar se procesi gjyqësor është në fazën e nxjerrjes së emrave dhe të dhënave të ndjeshme të dëshmitarëve për të akuzuarit.

Gjithashtu, trupi gjykues ka theksuar atmosferën e frikësimit të dëshmitarëve dhe ndërhyrjet në proceset penale kundër ish-anëtarëve të Ushtrisë Çlirimtare të Kosovës.

Prandaj, trupi gjykues ka arsyetuar se ka ende rrezik që Thaçi dhe Veseli të pengojnë ecurinë e procesit gjyqësor dhe të kryejnë krime të tjera. Për të kufizuar komunikimet e tyre dhe zvogëlimin e këtyre rreziqeve, do të zbatojë rregullat e monitorimit të komunikimeve në objektin e paraburgimit të Dhomave të Specializuara.