Bialiatski, fituesi i çmimit Nobel nga Bjellorusia dënohet me 10 vjet burg
Aktivisti pro-demokratik bjellorus, fitues i çmimit Nobel për Paqe, Ales Bialiatski është dënuar me 10 vjet burg, sipas grupit të të drejtave të tij, Viasna.
Dënimi me 10 vjet burg është denoncuar si një “padrejtësi e turpshme” nga liderja kryesore e opozitës Sviatlana Tsikhanouskaya.
“Ales i ka kushtuar jetën e tij luftës kundër tiranisë. Ai është një hero i vërtetë i Bjellorusisë dhe do të nderohet shumë kohë pasi diktatori të harrohet”, ka shkruar Tsikhanouskaya përmes llogarisë së saj në Twitter.
Bialiatski u dënua së bashku me aktivistët e tjerë të të drejtave të njeriut, Valiantsin Stefanoviq, i cili mori një dënim me nëntë vjet burg dhe Uladzimir Labkovich, i cili u dënua me shtatë vjet.
Kush është Ales Bialiatski?
Ales Bialiatski ishte një nga udhëheqësit e lëvizjes demokratike në Bjellorusi në mesin e viteve 1980 dhe ka vazhduar të bëjë fushatë për të drejtat e njeriut dhe liritë civile në vendin autoritar, Bjellorusinë. Ai themeloi organizatën joqeveritare ‘Human Rights Center Viasna’ dhe fitoi çmimin ‘Right Livelihood’, i referuar ndonjëherë edhe si “Nobeli Alternativ”, në vitin 2020.
Bialiatski u arrestua pas protestave të vitit 2020 kundër rizgjedhjes së presidentit të Bjellorusisë Alexander Lukashenko, aleat i ngushtë i Putinit.
Kur iu dha Çmimi i Paqes në vitin 2022, Komiteti Nobel tha se “megjithë vështirësitë e jashtëzakonshme personale, Bialiatski nuk është dorëzuar asnjë centimetër në luftën e tij për të drejtat e njeriut dhe demokracinë në Bjellorusi” dhe u bëri thirrje autoriteteve bjelloruse ta lironin atë.
Komiteti i Nobelit tha gjithashtu në atë kohë se ata ishin në dijeni të mundësisë që duke i dhënë Bialiatskit çmimin, ai mund të përballet me një shqyrtim shtesë nga autoritetet në Bjellorusi./Euronews
