15,000,000 euro për Stadiumin e qytetit në Gjilan, në prill nis tenderimi

Ministria e Kulturës, Rinisë dhe Sportit (MKRS) duket se i ka kthyer edhe njëherë sytë nga Stadiumi i qytetit, në Komunën e Gjilanit.

Dikasteri i Kulturës dhe Sportit në vend ka njoftuar se ka ndarë 15 milionë euro për renovimin e Stadiumit të qytetit.

Kjo u bë e ditur nëpërmjet njoftimit paraprak të publikuar nga MKRS, në platformën elektronike për prokurimin publik në Kosovë: E-Prokurimi.

Sipas njoftimit, procedurat e prokurimit nëpërmjet të cilave pritet të nënshkruhet Kontrata parashihet të nisin, më 04.04.2025.

Vlera e parashikuar për këtë qëllim është 15,000,000 euro. Më shumë të dhëna lidhur me këtë projekt mund të mësohen tek pasi të fillojë procedura tenderuese.

Ndryshe, kreu i Komunës së Gjilanit, Alban Hyseni, gjatë fushatës zgjedhore si kandidat i Lëvizjes Vetëvendosje kishte premtuar disa projekte në rast se do të zgjidhej Kryetar i Komunës së Gjilanit, ku në mesin e tyre ishte edhe Stadiumi i qytetit.

Gjatë debatit “Jeta në Komunë”, ai kishte premtuar se çështja e Stadiumit të Gjilanit do të përfundonte gjatë vitit të parë të mandatit të tij si Kryetar.

Ekipi i KALLXO.com ka dalë në terren për të verifikuar nëse ky premtim është përmbushur. Në ditën e verifikimit, më 17.10.2024, vërejti se punimet në Stadiumin e Gjilanit nuk kanë lëvizur.

Përgjigjja e Komunës është se çështja e Stadiumit të qytetit është në fazën e prokurimit nga MKRS.