Titulli i rremë për heqjen e vizave
Deklarata
Komisioni Europian: Vizat për Kosovën të hiqen më së largu deri në këtë muaj
Vlerësimi
Rrenë
Titulli “Komisioni Europian: Vizat për Kosovën të hiqen më së largu deri në këtë muaj” është i rremë. Komisioni Europian nuk ka treguar datën kur do të liberalizohen vizat. Është Këshilli Europian dhe vendet anëtare që duhet të japin dritën e gjelbër për liberalizim të vizave. Në artikull nuk është cituar asnjë institucion apo person kompetent që tregon se kur do të ndodhë liberalizimi i vizave, as datë e as muaj.
Artikulli
Në faqen e internetit “Kosova-sot.info” më datën 21 shtator 2022 është publikuar një informacion me titullin “Komisioni Europian: Vizat për Kosovën të hiqen më së largu deri në këtë muaj”.
Kjo përmbajtje është shpërndarë edhe më datën 21 shtator 2022 në faqen e Facebook-ut që mban emrin “Kosova Sot”.
Ndonëse në titull paralajmërohet data kur do të bëhet liberalizimi i vizave sipas Komisionit Evropian, në artikull nuk thuhet një gjë e tillë.
Përmbajtja brenda artikullit i referohet një deklarate të zëdhënëses së Komisionit Evropian për Punët e Brendshme, Migracionin dhe Sigurinë e Brendshme, Anitta Hipper, e cila u ka bërë thirrje shteteve të BE-së që t’ua heqin regjimin e vizave qytetarëve të Kosovës.
Sipas Hipper, Kosova i përmbushë të gjitha standardet e Udhërrëfyesit për Liberalizimin e Vizave.
Pra, në artikull nuk figuron askund deklarata e saj se kur do të ndodhë liberalizimi i vizave, as datë e as muaj, përveç asaj që inkurajon shtetet anëtare të BE-së që ta bëjnë këtë.
Kosova është vendi i vetëm në rajon që nuk ka liberalizim të vizave.
