Haradinaj flet pas aksionit në veri për arrestimet lidhur me vrasjen e Oliver Ivanoviqit

Kryeministri i Kosovës Ramush Haradinaj, ka njoftuar se sot, me urdhër të Prokurorisë Speciale të Republikës së Kosovës, në veri të Kosovës është zhvilluar një operacion policor, që ndërlidhet me ndalimin e disa të dyshuarve për vrasjen e politikanit Oliver Ivanoviq.

Këtë njoftim Haradinaj e ka bërë në rrjetin social facebook, duke thënë se ky veprim policor ishte në pajtim të plotë me ligjin, konform urdhrit të Prokurorisë Speciale, dhe nuk ndërlidhet në asnjë mënyrë me asnjë zhvillim politik.

“Dua të siguroj të gjithë qytetarët se shteti i Kosovës dhe organet e tij të rendit, në asnjë mënyrë dhe asnjëherë nuk do të orientohet kundër asnjë grupi etnik apo politik. Thërras qytetarët, subjektet politike, kryetarët e komunave posaçërisht ata në veri dhe organet e tjera, që të kontribuojnë në mbajtjen dhe avancimin e qetësisë publike, në shërbim të paqes dhe stabilitetit”, ka shkruar Haradinaj.

Haradinaj shtoi se është më rëndësi që askush të mos bien pre e dezinformatave të ndryshme.

“Ruajtja e rendit dhe respektimi i ligjit është në interes të të gjithëve në Kosovë”, përfundoi ai.