Ndahet Posta nga Telekomi

Ministria e zhvillimit ekonomik tha sot se ‘vendimi për ndarje të Postës nga PTK, është marrë pas një analize të gjatë të funksionimit të ndërmarrjeve të telekomit dhe ndërmarrjeve postare si dhe pas analizimit të funksionit të PTK-së.’

“Vendimi për ndarje është mbështetur nga raporti për ndarje kontabël të PTK-së, i miratuar kohë më parë nga KQP, i cili përfshinë të gjitha detajet për ndarje të biznesit të postës nga ai i telekomit në PTK, si ndarja e aseteve kurrente dhe jo-kurrente, të hyrat, shpenzimet operative, punëtorët, provizionet për shërbime, etj,” thuhet në kumtesën për shtyp të ministrisë. 

Komisioni Qeveritar i Privatizimit të PTK-së, KQP ka marrë këtë vendim në bazë të autorizimit që ka nga vendimi i Kuvendit dhe qeverisë së Kosovës.

“Të gjitha asetet e paluajtshme që janë në pronësi të PTK’së aktuale, ti kalojnë Postës së Kosovës, e cila do të mbetet në pronësi publike,” thuhet më tej në kumtesë.

KQP tha se Posta në të ardhmen do të mund të funksionoj në mënyrë më efikase duke gjeneruar të hyra të mjaftueshme. 

KQP thekson se ky vendim është marrë në bashkëpunim me PTK’në dhe se tashmë ekziston regjistri i plotë i ndarë i aseteve dhe stafit.

“Po ashtu, duke ditur se ndarja e biznesit të postës dhe telekomit ka qenë synim i Qeverisë, në cilindo skenar, viti 2011 ka rezultuar me një skemë të gjerë investive në pjesën e Postës, të financuar nga korporata në përgjithësi, e investimet e tilla do të vazhdojnë deri në ndarjen finale,” lexon kumtesa. 

Pas disa përgatitjeve tjera, vendimi KQP’së do të mbëshetet nga një vendim i qeverisë së Kosovës që do të pasoj themelimin e ndërmarrjes së re publike në Kosovë. “Për bazë do të ketë aktivitetet postare në Kosovë.”