Gjykata dënon Sadik Bajramin për vrasjen e Ermal Kamberajt
Gjykata në Mitrovicë e ka shpallur fajtor dhe e ka dënuar të akuzuarin Sadik Bajrami për vrasjen e Ermal Kamberajt.
Pak orë pasi e pranoi fajësinë, Bajrami ka dalë para gjykatës për ta mësuar masën e dënimit për vrasjen e majit të vitit 2017.
Ai është dënuar me 12 vjet burg ndërsa në dënim do t’i llogaritet edhe koha e kaluar në paraburgim.
Gjykatësi i rastit Sinisha Mandushiq tha se atij paraburgimi do t’i vazhdohet deri në plotfuqishmërinë e aktgjykimit të sotëm, por jo më shumë se 12 vjet.
Ndërsa për veprën penale të armëbajtjes pa leje, i akuzuari Bajrami është dënuar me gjobë në shumë prej 500 euro ndërsa ai obligohet t’i paguajë edhe shpenzimet e procedurës penale në shumë prej 150 euro, paushall në vlerë 20 euro, dhe 50 euro për fondin e viktimave të krimit.
Paradite, që në seancën e parë të procesit gjyqësor, Sadik Bajrami e kishte pranuar fajësinë për veprën për të cilën akuzohet.
Vrasja me armë zjarri kishte ndodhur në maj të vitit 2017 në lokalin “Check In” të Mitrovicës, vendi ku viktima ishte duke punuar.
Pas leximit të akuzës nga ana e prokurorit të rastit, Bajrami u deklarua se e pranon fajësinë lidhur me veprën për të cilën akuzohet, ndërsa shprehu keqardhje dhe pendim për atë se çfarë kishte ndodhur, raporton Kallxo.com.
https://kallxo.com/mitrovice-i-akuzuari-pranon-fajesine-per-vrasjen-e-ermal-kamberajt/
“Po unë e ndjej veten fajtor, kërkoj falje dhe me vjen keq prej familjes”, ishin fjalët e të pandehurit në gjykatë.
Pranimi i fajësisë u mbështet edhe nga ana e prokurorit Njazi Rexha si dhe nga mbrojtësit i të pandehurit avokati Avdi Dinaj.
Pas kësaj gjykatësi Sinisha Mandushiq me aktvendim ka aprovuar pranimin e fajësisë për këtë vepër penale nga i pandehuri.
Sadik Bajrami akuzohet nga prokuroria se me 5 maj të vitit 2017 në lokalin “Check In“ që gjendet afër urës kryesore në Mitrovicë, në objektin e Qendres së Kulturës, kishte privuar nga jeta Ermal Kamberajn.
https://kallxo.com/varroset-ermal-kamberaj/
Sipas akuzës viktima kishte qenë në vendin e punës në cilësinë e menaxherit, ndërsa i akuzuari kishte shtënë në të me pistoletë “Crvena Zastava”.
Kurse tashmë i ndjeri Ermal Kamberi kishte vdekur si pasojë e shokut hemorragjik të shkaktuar nga gjakderdhja e jashtme dhe gjakderdhja e brendshme, si dhe dëmtimeve të shumta të organeve të barkut nga veprimi dinamik i predhave të hedhura nga arma e zjarrit.
I akuzuari Bajrami akuzohet edhe për veprën penale mbajtja në pronësi, kontoll ose posedim i paautorizuar i armëve.