Foto: QKUK/Facebook
Në QKUK kryhet operacioni i parë i perdes së lindur në sy tek fëmija 11 muajsh
Në Klinikën e Syve të Qendrës Klinike Universitare të Kosovës (QKUK) është kryer operacioni i parë i perdes së lindur në sy tek fëmijët.
Mjekët e kanë kryer operacionin për herë të parë tek një fëmijë 11 muajsh, operacioni i kataraktës kongjenitale (perdes së lindur në sy).
“E.O, e lindur në vitin 2018, nuk ka pasur nevojë të dërgohet për referim jashtë institucioneve publike shëndetësore, pasi që mjekët e operuan atë në klinikë pas ardhjes së aparaturës së re mjekësore”, thuhet në njoftimin e QKUK-së.
Në mungesë të aparaturës, rastet e tilla ishin referuar për trajtim mjekësor jashtë institucioneve publike shëndetësore, duke paguar deri në 5 mijë euro.
QKUK ka deklaruar se Klinika e Syve tashmë ka staf të përgatitur dhe aparatura për kryerjen operacioneve të tilla dhe pacientët nuk do të ketë nevojë të referohen për trajtim jashtë QKUK-së.
