Paraburgim ndaj 5 të arrestuarve që dyshohen se planifikuan vrasjen e dy personave në Pejë

Gjykata e Prishtinës e ka aprovuar kërkesën e Prokurorisë Speciale për caktimin e masës së paraburgimit ndaj D.R., R.B., SH.K., F.Q., dhe D.M., të cilët dyshohet se kishin planifikuar dhe ndërmarrë veprime përgatitore për kryerjen e veprave penale – vrasje, dhe – shkaktim i rrezikut të përgjithshëm.

Këtë për KALLXO.COM e ka konfirmuar zëdhënësja e Gjykata së Prishtinës, Mirlinda Gashi.

KALLXO.com ka raportuar sot, më 23.02.2025, se Prokuroria Speciale e Kosovës ka kërkuar caktimin e masës së paraburgimit ndaj këtyre 5 personave.

Më 22.02.2025, KALLXO.com ka raportuar se Drejtoria për Hetimin e Krimit të Organizuar dhe Prokuroria Speciale e Kosovës kanë arrestuar pesë persona, të cilët, sipas forcave të rendit, kishin planifikuar vrasjen e dy personave në Pejë.

Arrestimi i tyre u krye të premten, më 21.02.2025.

“Mbrëmë me datë 21.02.2025, është realizuar operacioni policor për arrestimin e ‘Grupit të Organizuar Kriminal’ të cilët kishin planifikuar dhe ndërmarr veprime përgatitore për kryerjen e veprës penale ‘Vrasje’ dhe dhe ‘Shkaktimit të Rrezikut të Përgjithshëm’ ndaj dy viktimave në Pejë” – thuhet në njoftim.

“Operacioni policor ka rezultuar me arrestimin e pesë persona të dyshuar: D.R., R.B., SH.K., F.Q., dhe D.M. të cilët me vendim të prokurorit nga PSRK janë ndaluar për 48 orë” – vijon njoftimi.

Policia kreu bastisje në gjashtë lokacione në ndryshme.

“Janë gjetur dhe sekuestruar armë të cilat do të përdoreshin për kryerjen e veprave penale si: granata dore, pushkë, revole dhe municion i kalibrave të ndryshëm.

Përveç kësaj janë gjetur dhe sekuestruar një sasi e lëndës narkotike, telefona celularë si dhe dëshmi të tjera materiale, të cilat do të përdoren në procedurën penale ndaj të dyshuarve” – thuhet në njoftim.