Ish rektori i Universitetit të Prizrenit del para gjykatës

Ramë Vataj, i akuzuar nga Prokuroria e Prizrenit se ka cenuar të drejtën e punësimit karshi kandidatit për punësim në Universitetin që ai e drejtonte, është deklaruar i pafajshëm para gjykatës.

Vataj me rastin e mbajtjes së shqyrtimit fillestar në Gjykatën e Prizrenit ka deklaruar se nuk e ndien veten fajtor, lidhur me veprën penale për të cilën akuzohet nga Prokuroria.

Prokuroria kishte ngritur aktakuzë ndaj ish-rektorit të Universitetit të Prizrenit, Ramë Vataj, që tani mban postin e kryetarit të Degës së PDK-së në Suharekë.

Aktakuza është ngritur nën dyshimin se Vataj ka cenuar të drejtën e punësimit karshi kandidatit për punësim në Universitetin që ai e drejtonte, Vehbi Miftari.

Vataj akuzohet se nga data 30.09.2017 e deri në tetor të vitit 2018, në Universitetin “Ukshin Hoti” në Prizren në cilësi të Rektorit të Universitetit, ia mohoi apo kufizoi personave tjerë të drejtën në punësim në kushte të njëjta.

Sipas Prokurorisë ai nuk e kishte zbatuar vendimin e Sektorit të Inspeksionit të Arsimit në Prizren të datës 14.09.2017, përmes të cilit urdhërohej Universiteti që të rishqyrtojë konkursin e datës 01.08.2016.

Ai në atë vendim ishte urdhëruar të themelojë komision recensues me kompetencë profesionale dhe kredibile në fushat specifike të publikuara në konkurs, të garantojë respektimin e akteve ligjore dhe nënligjore në fuqi, të trajtojë barabartë të gjithë pjesëmarrësit në konkurs si dhe Universiteti të përzgjedhë komision recensues të veçantë për çdo fushë.

“Vendim i cili në mënyrë të plotë nuk është zbatuar nga i pandehuri, me ç’rast të dëmtuarit Vehbi Miftari ia ka mohuar apo kufizuar të drejtën në punësim në kushte të njëjta me personat tjerë pjesëmarrës në konkurs”, thuhej në përgjigjen e Prokurorisë së Prizrenit dërguar për Kallxo.

Ramë Vataj mbajti pozitën e rektorit të Universitetit të Prizrenit deri në vitin 2018, ndërkaq tani këtë pozitë e mban Ismet Temaj.

Vata po ashtu në vitin 2019 u zgjodh kryetar i PDK-së në Suharekë.