Dosja e Prokurorisë: Viktimës së fajdeve vetura e 5mijë eurove ju llogarit 600

Gjykata në Ferizaj u ka caktuar masën e paraburgimit dy personave të dyshuar për fajde që sipas Prokurorisë në harkun e 10 muajve  ngarkuan me kamatë të fajdesë dy të dëmtuar  në shumë prej 40 mijë euro nga 16 mijë sa u kishin dhënë.

Po ashtu, sipas kërkesës së Prokurorisë,  të dyshuarit i morën të dëmtuarit një veturë të tipit “Citroen” dhe e llogaritën atë në vlerë të 600 eurove edhe pse vlera reale e veturës ishte rreth 5 mijë euro

Prokuroria pretendon se  Sylejman dhe Lavdim Trashani nga tetori i vitit të kaluar e deri më 23 gusht të këtij viti kanë shfrytëzuar gjendjen e rëndë financiar të dëmtuarve Basri  Dragaqina dhe Blerim Llapashtica duke kontraktuar shumë të parave dukshëm jo-proporcionale.

Gjithnjë sipas Prokurorisë, të dyshuarit e  detyrojnë të dëmtuarin  që t’ju jep zhavorr në vlerë prej 7 mijë euro, ndërsa i dëmtuari tjetër, Blerim Llapashtica në mars të këtij viti fillimisht hyn dorëzani për të dëmtuarin Basri i cili kishte obligime ndaj të pandehurve për t’ia sjellë disa kocka betoni për shtruarjen e oborrit në vlerë prej 6 mijë euro.

Paraprakisht, sipas Prokurorisë, të dyshuarit i kishin dhënë fajde të dëmtuarit Basri Dragaqina në shumë prej 16 mijë euro me interes 15% kamatë, ku i dëmtuari ka qenë i obliguar të paguaj kamatën për çdo 10 ditë dhe kështu ka arritur vlerën prej 40 mijë euro.

Kësisoj, Prokuroria pretendon se që pasi i kishte dërguar një pjesë të shumës së vlerës,  mbeti  borxh edhe 2550 euro, të cilat prokuroria pretendon se i dyshuari ja shndërroi në obligim me fajde  me interes 15% ashtu që për çdo 10 ditë është detyruar të paguaj nga 350 euro deri në kthimin e borxhit.

Si rrjedhojë, sipas kërkesës së Prokurorisë, në pamundësi që t’ia paguaj shumën prej 2550 euro, i dëmtuari është detyruar që të merr edhe 2 mijë euro borxh për t’ia kryer obligimin e tij dhe pastaj përsëri kishte marrë edhe 3500 euro për të cilat ka paguar çdo 10 ditë nga 550 euro,  me ç ‘rast sipas Prokurorisë, dëmi të cilin e kanë paguar të dëmtuarit kap shumën prej mbi 50 mijë euro.

Përpos fajdesë, i dyshuari Sylejman Trashani dyshohet se më 22 gusht të këtij viti në fshatin Bujanë të Lipjanit, në shtëpinë e të dëmtuarit Basri, e ka kanosur përmes djemve të vëllait të dëmtuarit duke i thënë “qitma jashtë Basrin se mrena është se kam me ngri” dhe “S’kam me lanë gja pa i ba nëse s’mi bjen paret”, përshkruhet në kërkesën e Prokurorisë.

Me këto veprime, Sylejman Trashani dyshohet se ka kryer veprën penale, detyrimi.