Zhdukja e mjekut Hafir Shala, dëshmitari rrëfen për momentin e ndalimit nga pjesëtarë të Policisë dhe të Sigurimit Shtetëror të Serbisë

Dy dëshmitarë janë dëgjuar në seancën e së enjtes (27.02.2025) në gjykimin ndaj të akuzuarit për krime lufte Sllavisha Filiq.

Shqyrtimi gjyqësor në këtë rast është duke u zhvilluar në mungesë të të akuzuarit.

Sllavisha Filiq po akuzohet se në cilësi të personit zyrtar, si pjesëtar i Sigurimit Shtetëror të Serbisë, së bashku edhe me dy zyrtarë të tjerë të këtij shërbimi, deri më tani të panjohur për organet e ndjekjes, kanë maltretuar mjekun Hafir Shala, i cili ende është i zhdukur.

Dëshmitari Hetem Sinani tha se u ishte zënë prita në ditën kur është marrë nga vetura doktor Hafir Shala.

“Pritë ka qenë, 100% i sigurt që ka qenë pritë, po emra nuk muj me dyshu në dikënd”- tha dëshmitari Sinani.

Dëshmitari deklaroi se kishte qenë bashkë në veturë në ditën kritike kur ishte marrë nga tre civilë doktor Hafir Shala.

Hetem Sinani deklaroi se në veturë në ditën kritike kishte qenë vetë ai, doktor Hafir Shala dhe Shaban Haziraj, dhe ishin ndalur nga policia për kontroll, dhe pas dhënies së dokumentacionit nga ana e policisë, ishin sulmuar nga tre persona të cilët kishin qenë civilë.

Dëshmitari Sinani tha se njëri nga tre civilët e kishte hapur derën e veturës dhe e kishte nxjerrë doktor Hafir Shalën jashtë, dhe kishte pyetur se çka është një dosje me dokumenta e cila kishte qenë në veturë.

“Ka thanë: “Çka është kjo fasikëll me dokumente?”. I thash: “Raportet të ‘Nanës Terezë’ janë”. Dhe ai i ka kapë dhe ia ka shti doktorit ndër krah fasikllën, dhe ia ka bo me gisht për me shku te xhipi” – tha dëshmitari Sinani.

Tutje, dëshmitari Sinani tha se pasi e kishin marrë doktor Hafir Shalën, atë dhe Shaban Hazirajn i kishin dërguar në stacion policor në Prishtinë, e kishin marrë në një dhomë dhe e kishin pyetur se “Pse po i çon barna ushtrisë dhe po e keqpërdorë veturën e shtëpisë së shëndetit?”. Ndërsa tha se u ishte përgjigjur: “Nuk është e vërtetë”.

Tutje, Sinani tha se ishte pyetur për persona të tjerë në stacion policor, dhe asnjëherë nuk ishte pyetur për doktor Hafir Shalën.

Dëshmitari Sinani tha se pasi kishte dalë nga stacioni i Policisë kishte shkuar të shikojë nëse është vetura, dhe pas disa minutave nga stacioni policor kishte dalë edhe Shaban Haziraj.

Tutje, dëshmitari Sinani tha se Haziraj i kishte thënë se e kishte dëgjuar zërin e doktor Hafir Shalës duke u maltretuar.

Dëshmitari Sinani tutje tha se asnjërin nga tre personat civilë nuk i ka njohur, dhe tha se nuk ua di emrat, dhe se po t’ua kishte ditur do t’i kishte treguar në fillim.

Në këtë seancë është dëgjuar edhe dhëndri i Hafir Shalës, dëshmitari Fisnik Thaqi.

Dëshmitari Thaqi tha se nuk ka parë asgjë pasi që nuk ka qenë prezent në ditën kritike.

I njëjti tha se ka disa dyshime lidhur me këtë rast.

“Dyshime kam. Ata që kanë qenë në kerr e dinë ma mirë… Na kemi dyshu në Fadilin dhe Sllavishën në bashkëpunim me Shabanin, unë dyshoj, çka kam ni” – deklaroi dëshmitari Thaqi.

Seanca e radhës lidhur me këtë çështje penale është e caktuar për në muajin mars 2025.

Gjykimi ndaj Sllavisha Filiqit është duke vazhduar në mungesë pasi që me të filluar ky gjykim kryetarja e trupit gjykues, Violeta Namani, ka konsideruar se janë përmbushur të gjitha kushtet që gjykimi të procedohet në mungesë të të akuzuarit.

Seanca fillestare lidhur me këtë rast është mbajtur më 15.05.2024.

Trupi gjykues në këtë çështje penale është i përbërë nga Violeta Namani- Hajra kryetare, dhe Lutfi Shala e Kushtrim Shyti – anëtarë.

Ndërsa aktakuza po përfaqësohet nga prokurori special Atdhe Dema.

Çfarë thotë dosja e Prokurorisë ?

Sipas dosjes së Prokurorisë ekziston dyshimi i bazuar mirë se i pandehuri Sllavisha Filiq, në cilësinë e personit zyrtar, si pjesëtar i Sigurimit Shtetëror të Serbisë, së bashku edhe me dy zyrtarë të tjerë të këtij shërbimi, deri më tani të panjohur për organet e ndjekës, më 10.04.1998, derisa viktima Hafir Shala, mjek me profesion, po udhëtonte me veturë private nga Drenasi (Gllogoci) për në Prishtinë së bashku edhe me dy persona të tjerë, përkatësisht Hetem Sinanin dhe Shaban Hazirajn, me të arritur në udhëkryqin e Sllatinës, afër aeroportit të Prishtinës, janë ndaluar nga pjesëtarë të uniformuar të Policisë serbe dhe Sigurimit Shtetëror të Serbisë, në mesin e të cilëve ishte edhe i pandehuri Sllavisha Filiq.

Në aktakuzë thuhet se pasi që ishin ndaluar, fillimisht ishin legjitimuar nga ana e Policisë, pastaj dr. Hafir Shala ishte marrë nga i pandehuri Sllavisha Filiq dhe dy të dyshuarit e tjerë – të tre të veshur me rroba civile, i njëjti ishte futur në veturën “Opel”, e tipit “Frontera”, me targa të regjistrimit PR-986-16, të cilën e drejtonte i pandehuri dhe ishte dërguar në ndërtesën e Sigurimit Shtetëror në Prishtinë, ku fillimisht u ishte nënshtruar rrahjeve dhe torturave dhe nga ajo ditë për fatin e tij nuk dihet asgjë, andaj me këtë ka kryer veprën penale – krime lufte kundër popullatës civile.

Për masakrat dhe krimet e tjera të luftës dhe krimet kundër njerëzimit të kryera në Kosovë nga forcat serbe e jugosllave gjatë luftës së viteve 1998/1999 ishin gjykuar, e disa edhe dënuar, ish-udhëheqësit më të lartë politikë dhe ushtarakë të Jugosllavisë së mbetur dhe të Serbisë.

Ish-presidenti i Jugosllavisë, Sllobodan Millosheviq, ishte akuzuar për krime lufte dhe për krime kundër njerëzimit, të kryera nga forcat serbe e jugosllave në Kosovë. Millosheviq ishte akuzuar për krime lufte dhe krime kundër njerëzimit të kryera edhe në luftërat në Bosnjë e Hercegovinë, si dhe në Kroaci.

Gjykimi i tij në Gjykatën ndërkombëtare penale për ish-Jugosllavinë (ICTY), me seli në Hagë, nuk kishte marrë epilog pasi Millosheviq kishte vdekur më 11.03.2006 në qeli teksa po mbahej në paraburgim.

Millan Millutinoviq, ish-kryetari i Serbisë, ishte liruar nga akuzat për krime lufte gjatë konfliktit në Kosovë.

Nikolla Shainoviq, zëvendëskryeministër i Republikës Federale të Jugosllavisë, ishte dënuar me 18 vjet burg për krime kundër njerëzimit dhe shkelje të ligjeve apo zakoneve të luftës.

Dragolub Ojdaniq, ish-shefi i Shtabit të Përgjithshëm të Ushtrisë jugosllave, ishte dënuar me 15 vjet burg për krime kundër njerëzimit.

Nebojsha Pavkoviq, ish-komandanti i Armatës së Tretë të Ushtrisë jugosllave, ishte dënuar me 22 vjet burg për krime kundër njerëzimit dhe shkelje të ligjeve apo zakoneve të luftës.

Vlladimir Llazareviq, ish-komandanti i Korpusit të Prishtinës të Ushtrisë jugosllave, ishte dënuar me 14 vjet burg për krime kundër njerëzimit.

Sreten Llukiq, ish-shefi i stafit të Ministrisë së Punëve të Brendshme të Serbisë për Kosovë, ishte dënuar me 20 vjet burg për krime kundër njerëzimit dhe shkelje të ligjeve apo zakoneve të luftës.

Aktgjykimin të plotë, në gjuhën angleze, e gjeni në link.