Vrasja në Vushtrri, informacionet e fundit nga vendi i ngjarjes

Njësi të shumta të Policisë së Kosovës dhe Mjekësia Ligjore janë në vendin e ngjarjes ku ka ndodhur vrasja e dyfishtë pasditen e së hënës në Vushtrri, më 24.03.2025.

Ekipi i KALLXO.com po qëndron në vendin ku ndodhi vrasja dhe ka raportuar detajet e fundit.

KALLXO.com mëson se viktima grua është e moshës rreth 40-vjeçare.

Deri më tani zyrtarisht nuk është bërë i ditur relacioni i viktimave.

Prokuroria Themelore në Mitrovicë ka njoftuar se një burrë dyshohet se ka vrarë fillimisht një grua, e më pas edhe veten.

“Dyshohet se një burrë e ka privuar nga jeta një grua fillimisht dhe pastaj ka bërë vetëvrasje.” – thuhet në njoftimin e Prokurorisë në Mitrovicë për vrasjen e dyfishtë.

Prokuroria ka theksuar më tej se në vendin e ngjarjes ka dalë edhe Prokurori kujdestar.

Sipas Prokurorisë, në vendngjarje janë gjetur disa gëzhoja që dyshohet se janë përdorur në këtë rast.

“Janë duke u intervistuar dëshmitarë dhe në koordinim me Policinë janë duke u hetuar të gjitha rrethanat, që kanë çuar në këtë ngjarje të rëndë.” – thuhet në njoftimin e Prokurorisë.

Brenda 24 orëve të fundit, dy raste të vrasjeve janë regjistruar në Vushtrri.

Mbrëmjen e së dielës, një 19-vjeçar mbeti i vrarë pas të shtënave me armë në qytetin e Vushtrrisë, nga një i dyshuar i moshës së njëjtë.

I dyshuari është arrestuar, ndërsa e ka pranuar fajësinë për vrasjen e bashkëmoshatarit të tij.

Ndaj të dyshuarit, Prokuroria në Mitrovicë bëri Kërkesën e paraburgimit.

Konfirmon Prokuroria: Vrasje e dyfishtë në Vushtrri