Vendet e BE-së pajtohen për lansimin e afatizuar të Sistemit të Hyrje/Daljeve për udhëtarë

Qëllimi kryesor i EES-së është që të modernizohen kontrollet në kufijtë e jashtëm të Bashkimit Europian dhe të zëvendësojë vulosjet tradicionale fizike të pasaportave. Aplikohet për qytetarët e shteteve joanëtare të BE-së që hyjnë në bllok për vizita, pushime ose biznes dhe të cilëve u lejohet një periudhë qëndrimi prej 90 ditësh brenda 180 ditësh.

Vendet e Bashkimit Europian janë pajtuar të mërkurën, më 05 shkurt 2025, që më në fund të fuqizojnë Sistemin e Hyrje/Daljeve (EES) – regjistër i automatizuar i bllokut për udhëtarët vizitorë, që është shtyrë vazhdimisht për shkak të problemeve teknike dhe mungesës së përgatitjeve – raporton televizioni informativ Euronews.

Marrëveshja e arritur prej Ministrave të Brendshëm në Bruksel trason rrugën për fillimin e mundshëm të operacioneve në vjeshtë, megjithëse ende nuk është caktuar një datë fikse.

Shtetet anëtare tash do t’i kenë dy mundësi: të lansojnë sistemin e ri të gjitha përnjëherësh, ose ta aktivizojnë në disa faza gjatë periudhës transitore prej gjashtë muajsh. Në fund të periudhës kalimtare, të gjitha kalimet kufitare do të kryhen sipas Sistemit EES.

Qasja e ndarë në faza nuk ishte parashikuar në legjislacionin burimor. Megjithatë, pas një takimi gjithëpërfshirës në nëntor ishte vendosur që të shikoheshin zgjidhjet alternative për të dalë nga ngërçi dhe që të niset me sistemin e shumëpritur.

Polonia, vendi i cili aktualisht ka kryesimin e radhës të Këshillit të BE-së, do t’u prijë negociatave me Parlamentin Europian për një Marrëveshje finale për Ligjin e amendamentuar, që pritet të kryhet pa ndonjë telashe.

“Tetori është në horizont.” – ka deklaruar Tomasz Siemoniak, ministër polak i Punëve të Brendshme dhe i Administratës.

Sistemi do t’u ofrojë shërbimeve të shteteve anëtare mekanizma të rinj për kontrollimin e hyrjeve dhe daljeve në Zonën Schengen, për kontrolle policore dhe kufitare. “Kjo është një çështje absolutisht thelbësore.” – ka thënë ai të mërkurën në mëngjes.

Çka është Sistemi i Hyrje-Daljeve (EES)?

EES-ja është reformë gjithëpërfshirëse që daton prej vitit 2016 dhe vazhdimisht është shtyrë. Qëllimi i saj kryesor është që të modernizohen kontrollet në kufijtë e jashtëm të Bashkimit Europian dhe të zëvendësojë vulosjet tradicionale fizike të pasaportave.

Aplikohet për qytetarë të shteteve joanëtare të BE-së, të cilët hyjnë në bllok për vizita, pushime ose biznes dhe të cilëve u lejohet një periudhë qëndrimi prej 90 ditësh brenda një periudhe 180-ditore.

Kur të digjitalizohet Sistemi, vizitorët do të mund t’i tregojnë pasaporta me të zbritur – duke shkrepur një fotografi dhe skanuar shenjat e gishtërinjve në mënyrë elektronike.

Do të regjistrohen të gjitha hyrje/daljet nga Zona e Schengenit, pa pasaportë.

Mbledhja e të dhënave biometrike dhe ndarja e informacioneve në kohë reale synojnë të ndihmojnë gjurmimin e atyre të cilët nuk respektojnë afatet ligjore të qëndrimit me viza afatshkurtra dhe bëjnë mashtrime identiteti.

Të gjitha shtetet anëtare – hiq Qipron dhe Irlandën dhe katër vendet e lidhura me Schengenin: Islandën, Lihtenshtainin, Norvegjinë dhe Zvicrën – do të marrin pjesë në skemë.

Pasaporta në Qipro dhe Irlandë do të vazhdojnë të kontrollohen manualisht.

Përgatiti: Rexhep Maloku – Kallxo.com