Turqi, arrestohen rreth 1 mijë persona pas sulmit vetëvrasës me bombë

Policia turke ka arrestuar pothuajse një mijë njerëz në bastisjet në të gjithë Turqinë të martën, duke përfshirë dhjetëra të tillë me lidhje të dyshuara me militantët kurdë si dhe një moderatore lajmesh të opozitës, disa ditë pas një sulmi vetëvrasës me bombë në kryeqytetin turk.

Ministri i Brendshëm Ali Yerlikaya tha se policia kreu bastisje në 16 provinca turke, duke arrestuar 55 persona të dyshuar se ishin pjesë e “strukturës së inteligjencës” të Partisë së jashtëligjshme të Punëtorëve të Kurdistanit, ose PKK. Të paktën 12 anëtarë të tjerë të dyshuar të PKK-së u arrestuan në një operacion të veçantë në pesë provinca, shkroi Yerlikaya në platformën e mediave sociale X, e njohur më parë si Twitter.

PKK mori përgjegjësinë për sulmin vetëvrasës, sipas një ueb-sajti lajmesh i afërt me grupin. Grupi i PKK-së ka udhëhequr një kryengritje prej dekadash në Turqi dhe konsiderohet një organizatë terroriste nga Shtetet e Bashkuara dhe Bashkimi Evropian. Dhjetëra mijëra njerëz kanë vdekur që nga fillimi i konfliktit në vitin 1984.

Një moderatore lajmesh 73-vjeçare u arrestua gjithashtu të martën pasi mori në pyetje detajet e llogarisë zyrtare të sulmit ndaj transmetuesit opozitar Halk TV.

Moderatorja Aysenur Arslan u ndalua në shtëpinë e saj pasi prokurorët e akuzuan për “propagandë terroriste” dhe “lavdërim të aktivitetit kriminal” për komentet e bëra gjatë programit të saj televiziv të hënën në mëngjes.

Liritë e mediave në Turqi ‘janë gërryer’ gjatë mandatit të presidentit Rexhep Tayyip Erdogan, sipas vëzhguesve ndërkombëtarë.

Pjesa më e madhe e mediave janë të orientuara në mbështetje të Erdoganit, ndërsa të paktë transmetues që i kritikojnë rregullisht politikat e tij janë denuar me gjoba ose ndërprerje nga mbikëqyrësi turk i medias RTUK. Turqia renditet e 149 nga 180 vende në indeksin e lirisë së shtypit të Reporterëve pa Kufij (RSF) në vitin 2022.

Ministri i Brendshëm tha më vonë se 928 persona të tjerë të dyshuar se mbanin armë zjarri pa leje ose ishin të lidhur me kontrabandën e armëve të zjarrit u arrestuan gjatë operacionit, por ai nuk bëri menjëherë të qartë nëse të dyshuarit e arrestuar për armë zjarri ilegale dyshoheshin për lidhje me PKK-në.

Tutje, ministri shtoi se gjatë operacionit janë konfiskuar mbi 840 armë zjarri.

Të dielën, një sulmues vetëvrasës shpërtheu një mjet shpërthyes pranë një hyrje të Ministrisë së Brendshme, disa orë përpara se Erdogan t’i drejtohej Parlamentit ndërsa po kthehej nga pushimet verore. Një sulmues i dytë i mundshëm u vra në një shkëmbim zjarri me policinë.

Nga sulmi u plagosën lehtë dy policë. Të dyshuarit arritën në vendngjarje brenda një automjeti që ata e morën nga një veteriner në Turqinë qendrore të Kajserisë pasi e qëlluan në kokë, thanë zyrtarët turq.

Autoritetet turke e kanë identifikuar një nga sulmuesit si një militant PKK. Disa orë më vonë, Forcat Ajrore të Turqisë kryen sulme ajrore në vendet e dyshuara të PKK-së në Irakun verior, ku është vendosur lidershipi i grupit. Ministria e Mbrojtjes tha se një numër i madh i militantëve të PKK-së u “neutralizuan” gjatë sulmeve.

Yerlikaya nuk sqaroi nëse personat e arrestuar të martën dyshoheshin për përfshirje të drejtpërdrejtë në sulmin e së dielës./AP