Fotografi e shkëputur nga transmetimi live nga stacioni i autobusëve në Prishtine, Foto: Gjirafa
Sërish alarm për mjet shpërthyes në Stacionin e Autobusëve në Prishtinë (VIDEO)
Mëngjesin e sotëm policia ka pranuar një telefonatë tjetër për vendosjen e një mjeti shpërthyes në Stacionin e Autobusëve në Prishtinë.
Lajmin e ka konfirmuar për KALLXO.com, zëdhënësja e Policisë së rajonit të Prishtinës, Florie Ahmeti- Haziraj.
Sipas Ahmeti- Hazirajt, policia ka pranuar një telefonatë anonime nga një person i cili kishte thënë se ka vendosur mjete shpërthyese në Stacion të Autobusëve.
“Menjëherë policia ka ndërrmarë të gjitha masat e sigurisë në atë zonë. Në një perimetër të caktuar ka evakuuar qytetarët, ndërkohë që janë angazhuar njësitet përkatëse për trajtimin e informatës”, tha Ahmeti-Haziraj për KALLXO.com.
Sipas të njëjtës, informata është trajtuar nga ana e policisë dhe pas kontrolleve të kryera nga njësitet kompetente, nuk është gjetur asgjë e dyshimtë.
“Njësitet policore janë tërhequr nga ajo zonë, ndërkohë që hetuesit kanë filluar punën për zbardhjen e të gjitha rrethanave që ndërlidhen me këtë rast”, shtoi ajo.
Një informatë të njëjtë Policia e Kosovës e kishte marrë edhe më 23 dhjetor.
Pas ekzaminimeve policore dhe evakuimit të qytetarëve në atë zonë, rasti në polici ishte hapur si lajmërim i rremë.
KALLXO.com gjithashtu ju prezanton edhe pamje nga stacioni i autobusëve në momentin kur policia evakuon qytetarët pas informacionit për mjet shpërthyes.