Mbledhja e Qeverisë së Kosovës 24.01.2024, Foto: Egzon Dahsyla/ KALLXO.com
Qeveria voton kandidatët për anëtarë në disa borde
Qeveria e Kosovës në mbledhjen e sotme ka votuar disa anëtarë të bordeve të disa ndërmarrjeve publike.
Në pikën e tretë të rendit të ditës u votuan emrat për anëtarë të Bordit të Organit Shqyrtues të Prokurimit (OSHP).
“Emrat e propozuar për një pozitë në Bordin e OSHP-së janë: Batisha Ibrahimi dhe Meriton Zika”- deklaroi Kurti.
Këto propozime i kaluan Kuvendit të Kosovës për miratim.
Pika e katërt ishte për emërimin e anëtarëve të Bordit të Kompanisë Rajonale të Ujitjes “Drini i Bardhë” në Pejë.
Kurti tregoi se në konkurs aplikuan 52 kandidatë, teksa lista e ngushtë kishte 29 kandidatë. Nga pesë ankesa, Kurti tregoi se 2 u aprovuan.
Emrat që u propozuan për drejtorë të bordit janë: Arjeta Zeka kryesues, Iljaz Halili, Shkodran Gaxherri, Zamire Deçani-Beqiri, Rina Sylafeta-Kumnova dhe Besim Kajabegolli si anëtarë.
Këta persona u caktuan në pozitat për të cilat u votuan me mandat prej 3 vjetësh.
Më tej, Qeveria e Kosovës caktoi dy anëtarë të Bordit të Kompanisë Rajonale të Ujësjellësit KRU “Prishtina”.
Bashkim Pllana u propozua si kryesues i bordit të drejtorëve dhe Fatos Budeci si anëtar.
Të dy u votuan nga qeveria për këto pozita.
21 kandidatë kishin aplikuar në këtë konkurs, 9 kandidatë ishin të përfshirë në listën e ngushtë. Katër persona u ankuan, njërit iu aprovua ankesa.
Qeveria e Kosovës gjithashtu gjatë mbledhjes ka miratuar Programin Legjislativ me 101 projektligje.
Kryeministri Albin Kurti e ka quajtur “ambicioz” këtë program.
“Programi Legjislativ i Qeverisë për vitin 2024 – Vazhdojmë me agjendë ambicioze me gjithsej 101 projektligje”, deklaroi Kurti.
Kjo pikë e rendit të ditës u miratua nga Qeveria e Kosovës.
“Pika 2: Jemi zotuar që do ti mbështesim bashkëkombasit tanë në Preshevë, me propozimin e ri personat nga ajo trevë do të përfitojnë të drejtat pronësore në Kosovë, sipas kushteve të parapra me ligj”- deklaroi Kurti.
Minsitrja e Drejtësisë, Albulena Haxhiu tha se me këtë ndryshim banorët e Luginës së Preshevës do të përfitojnë të drejtën për prona.
