Protesta të ashpra në Turqi pas arrestimit të rivalit të Erdoganit

Dhjetëra-mijëra protestues kanë marrë pjesë në demonstratat në rrugë në mbarë Turqinë, pasi edhe zyrtarisht është arrestuar rivali kryesor i presidentit Recep Tayyip Erdogan dhe është akuzuar për korrupsion – raporton BBC.

Ekrem Imamoglu, kryetar i Stambollit, pritej të zgjidhej të dielën kandidat zyrtar i Partisë Republikane Popullore (CHP) për Zgjedhjet presidenciale të vitit 2028.

Në reagimin ndaj arrestimit të tij, të dielën mbrëma u mbajtën demonstratat me trazirat më të mëdha në dekadën e fundit, me Policinë që ka përdorur gaz lotsjellës dhe plumba gome ndaj protestuesve.

“Asnjëherë nuk do të gjunjëzohem”

Imamoglu ka thënë se akuzat ndaj tij janë të motivuara politikisht. “Asnjëherë nuk do të gjunjëzohem.” – ka shkruar ai në X para se të paraburgosej.

Erdogani i ka dënuar demonstratat dhe ka akuzuar CHP-në se po mundohet “ta prishë paqen dhe të polarizojë popullin tonë”.

Turmat janë mbledhur para ndërtesës së Komunës së Stambollit në mbrëmjen e së dielës për të pestën ditë me radhë – duke valuar flamuj të Turqisë dhe brohoritur para Policisë speciale kundër trazirave.

Policia është parë duke përdorur topa uji në drejtim të protestuesve, por edhe sprej.

Gruaja e Imamoglut, Dilek Kaya i është adresuar turmës së madhe para ndërtesës komunale, duke iu thënë demonstruesve se “padrejtësia” ndaj burrit të saj do të prekë ndërgjegjen e çdo qytetari.

Demonstratat kundër arrestimit të Imamoglut janë më të mëdhatë prej atyre të Gezit më 2013, që nisën në Stamboll kundër prishjes së një parku lokal.

Në total tubime janë mbajtur në së paku 55 prej 81 provincave turke, ose në më shumë se dy të tretat e vendit – ka bërë të ditur Agjencia franceze e lajmeve AFP.

Imamoglu ishte njëri prej më shumë se 100 personave, përfshirë politikanë të tjerë, gazetarë dhe biznesmenë, të arrestuar si pjesë e një hetimi të ndërmarrë të mërkurën.

Ai është arrestuar zyrtarisht të dielën dhe është akuzuar për “themelimin dhe menaxhimin e një organizate kriminale, duke marrë ryshfet, zhvatje dhe incizim të paligjshëm të të dhënave dhe për kurdisje të një tenderi”.

 “Njollë në demokracinë” turke

Ai do të mbahet në paraburgim derisa të zhvillohet procesi gjyqësor. AFP-ja dhe mediat lokale kanë raportuar se ai është dërguar në Burgun e Silivrit.

Imamoglut i është suspenduar edhe detyra e Kryetarit – ka bërë të ditur Ministria e Brendshme turke në një deklaratë.

Në postime në mediat sociale Imamoglu ka kritikuar arrestimin e tij si “njollë të zezë në demokracinë tonë” dhe ka thënë se nuk është ndjekur as procedura e duhur e Sistemit të Drejtësisë.

Ai u ka bërë thirrje qytetarëve në mbarë vendin që të dalin në protesta dhe të marrin pjesë në votimin për kandidat presidencial.

Në një mesazh të shpërndarë në X nëpërmjet avokatëve të tij të dielën mbrëma, Imamoglu ka përshëndetur qytetarët protestues dhe ka thënë se votuesit kanë treguar se është bërë “mjaft” me Erdoganin në krye të Turqisë.

Imamoglu ishte personi i vetëm në listën e kandidatëve të CHP-së për Zgjedhjet presidenciale turke.

Përgatiti: Rexhep Maloku – Kallxo.com