Prokuroria e Prizrenit kërkon paraburgim prej 30 ditësh për dhjetë të dyshuar për bixhoz

Prokuroria Themelore në Prizren sot me 02.03.2025 ka bërë kërkesë në Gjykatën Themelore të Prizrenit, për caktimin e masës së paraburgimit në afat prej 30 ditësh, ndaj dhjetë të dyshuarve për veprën penale ”Organizimi i skemave piramidale dhe bixhozit të paligjshëm”.

Siç theksohet në njoftimin e Prokurorisë, më 28.02.2025, rreth orës 23:00 minuta, në Suharekë, në kafiterinë “R.G.Z”, i pandehuri L.R., njëherit pronar i lokalit, me qëllim të përfitimit të kundërligjshëm të dobisë pasurore për vete, organizon dhe merr pjesë në organizimin e lojërave të fatit.

Sipas Prokurorisë, pronari i lokalit dyshohet se në mënyrë të kundërligjshme dhe të fshehtë, lokalin e ka përdorur për lojëra të fatit.

Me të depërtuar zyrtarët policorë brenda lokalit sekuestruan të holla dhe letra bixhozi.

“Nga të pandehurit e lartëcekur janë sekuestruar në total pesëmbëdhjetë mijë e dyqind e gjashtëdhjetë euro (15.260 €), dhe njëmijë e dyqind franga Zvicerane (1.200 CHF). Gjithashtu, tek i pandehuri L.R., – pronari i lokalit të lartcekur janë gjetur letra në sasi prej tremijë e treqind e njëzet e gjashtë (3326 copë), të cilat janë përdorur për lojë bixhozi natën kritike”- thuhet në njoftimin e Sistemit Prokurorial të Kosovës.

Të pandehurit L.R.,P.B., B.Q., F.C., B.K., P.Sh., N.R., S.B., R.A., dhe M.Sh., gjenden në ndalim 48 orësh nga data 01.03.2025 për veprën penale: ”Organizimi i skemave piramidale dhe bixhozit të paligjshëm”.