Foto: Policia e Kosovës
Policia sekuestron mallra pa dokumente në një depo në Leposaviq
Në një depo në Leposaviq, Policia e Kosovës ka sekuestruar sot pije alkoolike e joalkoolike, cigare, vaj, sheqer e produkte të tjera ushqimore pa dokumente përkatëse.
Policia thotë se veprimet hetimore e operative u ndërmorën pas pranimit të informacionit për këtë dyshim.
“Pas dyshimit se është kryer vepra penale ,,Shmangia nga pagesa e tarifave të detyrueshme doganore ose tarifave akcizore” është njoftuar edhe njësiti anti-kontrabandë nga Dogana e Kosovës të cilët kanë dalë në vendin e ngjarjes” – thuhet në komunikatë.
Kontrolli ka rezultuar me sekuestrimin e 500 litrave pije alkoolike (verëra e birra), 200 litrave pije joalkoolike, 450 litrave vaj, 500 kilogramëve sheqer, 300 kilogramëve produkte të tjera ushqimore dhe 10 boksave cigare pa banderola.
Mbi bazën e këtyre veprimeve, Policia thotë se është krijuar dyshimi se pronari i depos dyshohet se ka kryer veprën penale – shmangia nga pagesa e tarifave të detyrueshme doganore ose tarifave akcizore.
Të gjitha veprimet hetimore kanë qenë në koordinim me Prokurorinë Themelore në Mitrovicë.