Pesë të arrestuar për drogë dhe armë pa leje, katër prej tyre lirohen në procedurë të rregullt

Pesë persona janë arrestuar nën dyshimin se kanë poseduar lëndë narkotike, gjithashtu armë pa leje, në dy lokacione në Kryeqytet, më 02.04.2025.

Në rrugën “Nazim Gafurri” në Prishtinë një burrë është arrestuar, pasi që në shtëpinë e tij i janë gjetur dhe konfiskuar lëndë narkotike të llojit marihuanë e kokainë.

“Gjatë kontrollit tek i njëjti janë gjetur dhe janë konfiskuar 10.7 gramë substancë e dyshuar narkotike, e llojit marihuanë. Në konsultim me Prokurorin është bastisur shtëpia e të dyshuarit, me ç’rast janë gjetur dhe janë konfiskuar edhe 75.6 gramë substancë e dyshuar narkotike e llojit marihuanë, 1.2 gramë substancë e dyshuar narkotike e llojit kokainë dhe dy peshore.” – thuhet në njoftimin e Policisë së Kosovës.

Me Urdhër të Prokurorit, i dyshuari është dërguar në mbajtje.

Ndërsa në lokacionin tjetër, në rrugën “Sokol Sopi”, në Prishtinë janë arrestuar katër persona.

“Tek të njëjtit janë gjetur dhe janë konfiskuar 10.4 gramë substancë e dyshuar narkotike e llojit marihuanë.” – theksohet në njoftimin e Policisë së Kosovës.

Pas intervistimit, me Vendim të Prokurorit, të dyshuarit janë liruar në procedurë të rregullt.