PDK: Me bekimin e Radojiçiqit, 'Qeveria Zdravo' po emëron zyrtarë që cenojnë shtetin

Deputetja e Partisë Demokratike të Kosovës, Blerta Deliu-Kodra ka thënë se emërim i Radoica Radomiroviqit drejtor në Komunën e Leposaviqit, “e cenon” karakterin e shtetit dhe institucioneve publike të Kosovës.

Në media është raportuar se Radoica Radomiroviqit është djali i Nikolla Radomiroviq, ushtar i ushtrisë serbe.

“Siç po e shihni, tashmë, Afera Zdravo, nuk është thjeshtë një aferë e simpatisë në mes të Listës Serbe dhe Albin Kurtit, por është aferë që ka implikime direkte në shoqërinë dhe në shtetin tonë, e mbi të gjitha në vetë karakterin e shtetit tonë. Para disa ditësh, në media doli një intervistë e ish-deputetit të Listës Serbe Slavko Simiq, i cili, në përgjigje ndaj “kinse padisë” nga ana e Mimoza Kusarit për përgjimet e Aferës Zdravo, i nxori edhe disa pretendime jashtëzakonisht shqetësuese, për të cilat, konsiderojmë se duhet të jenë të shqetësuar të gjithë qytetarët e Kosovës. Në mes tjerash, u pa qartë se koordinimi në mes të Albin Kurtit dhe kriminelit Milan Radojiçiq, është koordinim shumë më i thellë, e më i fortë, sesa përpjekjet idioteske të koalicionit Zdravo për ta minimizuar atë”- ka thënë Deliu-Kodra.

Sipas Deliu-Kodrës, “nga takimet e rregullta e të njëpasnjëshme të Kusarit me Simiqin”, ka zgjedhur njerëz nëpër institucione publike me “bekimin e Radojiçiqit”.

“Nga Simiqi mësuam se Radojçiqi e ka mbështetur Qeverinë Zdravo të Albin Kurtit, për shkak se përmes saj, ai ka realizuar interesat kombëtare të Serbisë. Paramendoni, kemi një qeveri, e cila duke shkelur mbi karakterin e shtetit, i akomodon interesat kombëtare të Serbisë përmes koordinimit me një kriminel ordiner si Milan Radojiçiq. Kjo është ajo çfarë na shqetëson dhe duhet të na shqetësojë të gjithëve”.

“Dhe për fund, kuptuam po ashtu se Mimoza Kusari, protagonistja e aferës Zdravo, në fakt paska mundësi të jetë protagoniste edhe e shumë përgjimeve të tjera, për të cilat paralajmëroi Simiqi, gjë që dëshmon qartë se ne dhe qytetarët e Kosovës, mund të kemi parë vetëm një pjesë fort të vogël, të llumit të madh anti-shtetëror, antikombëtar e anti-institucional, në të cilën është përfshirë qeveria Zdravo, Albin Kurti dhe Mimoza Kusari”- theksoi ajo.

Po ashtu, deputetja Deliu-Kodra ka kërkuar mbajtjen e zgjedhjeve të jashtëzakonshme, “për të ndalë degradimin” e vendit nga Qeveria Kurti.

“E përsërisim edhe një herë se katandisja e përgjithshme e vendit nga qeveria Zdravo, është duke iu kushtuar qytetarëve në çdo drejtim, prandaj ne duam zgjedhje të jashtëzakonshme në mënyrë që qytetarët ta ndalin rrugën e turpit, degradimit e shthurjes së çdo gjëje që Zdravo Qeveria e ka nisur tash e gati tre vite”- shtoi ajo.