Pas konferencës së Kurtit reagon Lista Serbe e quajnë Rashiqin 'ish-serb'

Lista Serbe ka reaguar duke publikuar një njoftim në rrjetin social Facebook, pas konferencës së Kryeministrit Albin Kurti dhe Ministrit për Komunitete dhe Kthim, Nenad Rashiq e të cilët thanë se në procesin e fushatës zgjedhore dhe në ditën e votimit pati presion dhe ndërhyrje nga strukturat serbe.

Lista Serbe në reagimin e tyre kanë ironizuar faktin se në konferencë Kurti doli me ministrin Rashiq duke e quajtur këtë të fundit edhe si ‘njeri të kryeministrit’ dhe ‘ish- serb’.

“Kurti sot me të preferuarin dhe të mbrojturin e tij, ish-serb, Nenad Rashiq, në konferencën për shtyp duke thënë gënjeshtra brutale, konfirmoi atë që të gjithë e dimë mirë, se Nenad Rashiq është drejtpërdrejt nën kontrollin e tij, se mandati i dedikuar për popullin serb iu mor serbëve me votat e shqiptarëve”- thuhet në reagimin e Listës Serbe.

Sipas reagimit, Lista Serbe thotë se Rashiq me veprimin që bëri në konferencë me Kurtin tregoi se ai asnjëherë nuk ka qenë dhe nuk do të jetë përfaqësues i popullit serb.

“Për të shkuar edhe më keq, pasi një ish-ministër për komunitete dhe riatdhesim u ngrit kundër të drejtës që serbët e zhvendosur të rikthehen në Kosovë dhe Metohi, dhe të përdorin të drejtën e tyre njerëzore dhe politike të zgjedhin për përfaqësuesit e tyre. Ky fakt do të mbetet i shkruar përgjithmonë, si dhe se Rashiq është serb i cili votoi se serbët janë gjenocidalë, por edhe shteti i Serbisë, i cili votoi për marrjen e tokës serbe dhe ftoi të rinjtë serbë të jenë ushtarë të Kurtit”- thuhet tutje në reagim.

Sipas Listës Serbe edhe Kurti dha para te anëtarët e komisioneve zgjedhore shqiptare por që nuk arriti të mposhtë serbët.

“Duhet të dihet se këto zgjedhje kanë treguar edhe forcën e harmonisë serbe edhe unitetin serb, por edhe hipokrizinë e disa organizatave ndërkombëtare, siç është fondacioni gjerman G**, i cili në mënyrë të paligjshme ndërhyri brutalisht në procesin zgjedhor, dhe vetëm pak ditë para zgjedhjeve i dha përkrahje Rashiqit përmes nënshkrimit të disa kontratave, të cilave Rashiq i bekuar nga Kurti bleu votat e naivëve”- thuhet në reagim.

Kryeministri Albin Kurti ka thënë se Presidenti i Serbisë, Aleksandër Vuçiq ka ndërhyrë në zgjedhjet parlamentare në Kosovës përmes qeverisë, inteligjencës e krimit të organizuar serb.

Këto deklarime Kurti i bëri në një konferencë e cila po mbahet në ndërtesën e Qeverisë së Kosovës së bashku me Ministrin për Komunitete dhe Kthim, Nenad Rashiq.

“Ndërhyrja e Serbisë në zgjedhjet tona parlamentare është një cënim që I bëhet demokracisë dhe sovranitetit të Kosovës. Ajo ka ndikuar në përzgjedhjen e deputetëve serb dhe pakicave jo serbe e të cilat janë në kontroll të plotë të presidentit të Serbisë, Aleksandër Vuçiq, të qeverisë dhe inteligjencës serbe e të krimit të organizuar atje”- tha Kurti.

Kurti: Serbia ndërhyri në zgjedhjet parlamentare në Kosovë, kjo është cënim i demokracisë